رواية قلبي ليس بيدي 3 الفصل التاسع عشر 19 بقلم حسناء رمضان

جاك مشي عليه بسرعه...

جاك: اظن انا حذرتك قبل كدا..

وقبل مايرد حتى فضل يضرب فيه... طلعت اجري عشان ابعده عنه..

جاكي: جاك اي اللي بتعمله دا..

جاك: اسمع يلااا... لو شوفت وشك بس ولو بالصدفه، صدقني همحيك..

جاكي: اي اللي حصل لكل دا.. ماتفهمني..

جاك: اسأليه.. كان بيلعب بيها..

متيم: ماهو دا اللي انا قولته ومحدش صدقني..

جاكي: استحاله...

جاك: تطلع تاخد حاجتك وتمشي من هنا... مش عايز اشوف وشك تاني... ولو قربت لاسيل تاني قول ع نفسك يارحمن يارحيم...

سابه ومشي وهو طلع اوضته..

طلعت وراه لقيته بيلم حاجته...

جاكي: ممكن ادخل!

عدي: اتفضلي..

جاكي: ممكن اتكلم معاك شويه!

قعد وهو ساكت..

جاكي: ليه ياعدي!.. ليه عملت فيها كدا.. لما انت هتسيبها بتقربلها ليه من الاول.. احنا بنحاول نعمل كل اللي نقدر عليه عشان نطلعها من الحاله اللي هي فيها ونساعدها تاخد علاجها ومتعاندش... مش انت بتحبها!!.. طب ليه كسرتها كدا!!

كان باصص ف الارض ومبيردش... رفعت وشه لقيت دموعه بتنزل..

جاكي: طب ع الاقل فهمني..

عدي: انا بحبها.. بحبها فوق ماتتخيلي والله..

جاكي: امال ليه عملت كدا..

عدي: عشان مصلحتها..

جاكي: ازاي..

عدي: انا لسه طالب.. واكيد شغلي مش هيساعدني عشان اعرف اصرف عليها زي ماهي عايزه ولا اصرف ع علاجها... لو عليا اديها عيني والله... بس انا مقدرش اضحي بيها واتجوزها وانا عارف اني مش هقدر اجيبلها العلاج او ابقى موجود لو حصلها حاجه.... انا عاجز مش اكتر... هي دلوقتي معاكوا انتوا تقدروا تساعدوها... بس صدقيني دلوقتي هبقى بظلمها معايا وهي تعبانه... وحياة ربنا لو عليا انا عايزها دلوقتي حالا.. بس غصب عني.. انا مقصدش اني اجرحها ابدا.. انتي فاهماني!

جاكي: يعني انت كل مشكلتك دلوقتي انك مش مقتدر ماديا عشان تريحها زي مانت عايز..

عدي: بالظبط... بعد ماتخرج لربما اعرف اعمل اي حاجه.. بس كمان مش عايز اعطلها كل دا.. بصي انا مبقتش فاهم حاجه..

جاكي: وليه مقولتش كدا لجاك!

عدي: هو مدانيش فرصه اتكلم اصلا.. وهي زعلت مني ومرضتش تسمعني... انا والله مش قصدي حاجه... ومرضها ميفرقش معايا... انا بحبها زي ماهي كدا..

جاكي: طب مش انت بتشتغل!

عدي: ايوا.. وعندي استعداد اشتغل شغل تاني او اسيب الجامعه كمان..

جاكي: خلاص ياعدي محلوله اهي.. انت بتشتغل وتتخطبوا وحوار العلاج دا علينا احنا... انت مش مضطر ابدا تشيل هم حاجه زي كدا.. وعارفه انك لو قادر مكنتش هتستخسر فيها حاجه... وفاهمه انك مش عايزها تتعب معاك... انا فاهمه كل حاجه.. بس قولي دلوقتي... لسه عايزها!!

عدي: اكيد..

جاكي: خلاص... صالحها وملكش دعوه بحوار الماديات دا.. العلاج علينا احنا وع فكره هي مبيفرقش معاها الكلام دا.. فبلاش تخسرها ياعدي..

عدي: انا حاسس اني بوظت الدنيا.. وهي مش هتسامحني اكيد..

جاكي: لا.. لما تعرف قصدك اكيد هتسامحك... وانا هفهمها..

عدي: وجاك بيه اكيد مش هيسامحني يعني..

جاكي: بص.. اولا مسمهوش جاك بيه.. قوله عمي لو عايز.. او ناديله باسمه هو مش بيعترض.. ثانيا بقاا انا هفهمه قصدك واكيد هيلين يعني... المهم دلوقتي سيب اللي ف ايدك دا وفكر هتصالحها ازاي وانا هطلع افهمها..

عدي: ماشي...

سيبته وروحت لاسيل لقيتها لسه ف اوضتها وجاك معاها..

جاكي: لي عملت كدا ياجاك!

جاك: عايزاني اعمل اي يعني!.. اشوفه بيلعب بيها واقف اتفرج!!

جاكي: ومين قالك انه بيلعب بيها.. انت مديتوش فرصه يتكلم..

جاك: جي متدافعيش عنه... هو كدا خلاص طلع من حياتنا... ويحمد ربنا اني مدفنتوش...

جاكي: طب تعالى معايا طيب..

جاك: مش دلوقتي..

جاكي: يلا.. هقولك حاجه...

خدته وروحنا الاوضه..

جاك: خير..

جاكي: انت فاهم غلط..

جاك: جي.. مش عايز رغي ملوش لازمه..

جاكي: طب بالعقل كدا.. لو هو بيلعب بيها هييجي يقعد معانا ليه!!... هيتقدم ليه!!.. طب ماهي اتخطفت معاه.. معملهاش حاجه ليه!!... مسابهاش وهرب هو ليه!!... كل دا يدل ع انه بيحبها فعلا ياجاك..

جاك: ولما هو بيحبها سابها ليه!!..

جاكي: عشان حس انه مش هيقدر يوفرلها اللي هي محتاجاه.. هو دلوقتي لسه طالب وبيشتغل ومامته تعبانه... هيصرف ع كل دا منين!!... وانت عارف علاج اسيل مكلف ازاي... هو لو عليه يديها من عينه... بس هو مش عايز يتعبها معاه... عشان متجيش ف يوم وتقوله كلمه كدا وكدا... وانت عارف ان اسيل مش هتتأقلم مع ظروفه بسهوله وخاصه وهي تعبانه... هو خايف بس احسن ميقدرش يوفرلها اللي هي محتاجاه... عشان كدا قال ان وجودها معانا هيريحها اكتر..

جاك: مقليش كدا..

جاكي: انت اديته فرصه ينطق!!

جاك: ولما هو عارف انه مش قادر يسعدها، بيتقدم ليه من الاول..

جاكي: ياجو ماهو ف الاول مكانتش تعبانه... فكان الموضوع سهل... هو خايف احسن ميقدرش يجيبلها العلاج او لو في عمليات وكدا عشان بس هي متتعبش معاه... وبعدين معاه حق.. دا طالب ياجاك ولسه صغير...

جاك: ماشي.. طلاما هو عايز كدا خلاص.. اديني هعفيه من الهم اللي كان عليه..

جاكي: بس هو عايزها..

جاك: هو مش لعب عيال.. مينفعش يفضل يجرحها كدا.. افرضي قالها حاجه تاني..

جاكي: اسمع ياجاك... هما يرجعوا عادي.. بس مصاريف مرضها تبقى علينا احنا... مينفعش نحمله المسؤوليه دي.. وانت عارف ان مفيش حاجه ف ايده يعملها...

جاك: لا ياجي.. مش هسمحله يضايقها تاني..

جاكي: جاك.. انت عارف ان هما بيحبوا بعض..

جاك: وانا بحب بنتي اكتر.. وبعدين لازم نفسيتها تبقى كويسه... بالطريقه دي عمرها ماهتخف ياجي..

جاكي: طب ملكش دعوه انت وهو هيصالحها.. هو مكنش يقصد يجرحها... وهي مفهمتش هو يقصد اي..

جاك: بقولك اي.. متبقيش انتي السبب ف اني اقضي عليه.. لو لقيتها زعلانه تاني صدقيني مش هرحمه... فخلينا ننهي الحوار دا من الاول..

جاكي: مش هيزعلها تاني.. وعد مني..

جاك: انتي المسؤوله ياجي..

جاكي: ايوا..

جاك: براحتك... بس انتي اللي هتتحملي نتيجة كل حاجه..

جاكي: ملكش دعوه انت... انا هتصرف..

.............

وعد: مرزوع لوحدك ليه..

متيم: ماتحترمي نفسك يابت انتي..

وعد: محترمه غصب عنك..

متيم: واضح..

وعد: عيل براس بخاخه صحيح..

متيم: نيني.. عسل..

وعد: اكيد يعني..

متيم: طب قومي امشي يلا من هنا..

وعد: هو انا قاعده عندك!

متيم: ايوا.. انا جيت هنا الاول..

وعد: طب مش هقوم يامتيم... وادي قعده يامتيم..

متيم: بارده..

وعد: طب بقولك اي.. الواد المز اللي قاعد هناك دا ماله.. زعلان ليه..

متيم: الواد مين!!

وعد: المز دا.. اسمه عدي تقريبا..

متيم: ااه.. مز بقاا..

وعد: بصراحه ااه..

متيم: دانتي ليلة ابوكي سودا..

وعد: بقولك اي احترم نفسك..

متيم: بقاا عدي مز ياوعد!

وعد: ااه... واحلى منك كمان..

متيم: بقاا كدا!... طب تمام.. متتكلميش معايا تاني..

سابها وقام مشي..

وعد: ولاااا.. استني ياااض.. انت قموصه لي..

بصلها بقرف ومردش..

وعد: امم.. غيران..

متيم: اسكتي عشان مبوظش وشك..

وعد: انت احلى ع فكره..

متيم: قولت اسكتي..

وعد: ماخلاص بقى.. اي الدلع دا.. ماقولت خلاص.. اي.. هي حكايه.. ماقولنا كنت بهزر..

متيم: ماتخرسي بقاا..

وعد: طب بقولك اي.. هو ماله بجد!

متيم: مالوش.. متخانق مع اسيل..

وعد: امم.. بس باين انه متضايق قوي..

متيم: طب اتلمي وبطلي تبصيله..

وعد: الحلو بيغير ولا اي..

متيم: استغفر الله العظيم...

وعد: طب عليا الطلاق بتغير..

متيم: لا مبغرش... هغير عليكي ليه اصلا..

وعد: طب عيني ف عينك كدا..

متيم: اهو..

وعد: ياختااااي.. اي الجمال دا ياولااااا..

ضحك وبص بعيد..

وعد: ايوا اضحك يعم محدش واخد منها حاجه..

متيم: هموت واعرف اي اللي مخليني مستحملك لحد دلوقتي..

وعد: عشان انا حتة قمرايه... وبعدين هتلاقي زيي فين.. وهو انت كان في حد هيعبرك اصلا!

متيم: امشي ياوعد..

وعد: متزقش طااه..

متيم: طااه!.. انا ماشي.. ومتجيش ورايا.. مش هنلعب احنا..

وعد: طب والله فكره... يلا نلعب..

متيم: امشي ياوووووعد..

وعد: هنلعب يامتيم.. هه

متيم: مش لاعب ياوعد..

وعد: هنشوف كلام مين اللي هيمشي يامتيم..

.......................

اسيل: يعني هو دا السبب!!

جاكي: ايوا ياختي.. وانتي زي الغبيه روحتي اتقلبتي فيه من قبل مايتكلم.. حرام عليكي.. الواد عامل ع راحتك مش اكتر... يعني حب يضحي بحبه ليكي عشان حس انه هيقصر معاكي...

اسيل: وانا اللي ظلمته..

جاكي: شوفتي..

اسيل: بس بردو ياماما.. مينفعش ييجي بسهوله كدا ويقولي هنسيب بعض.. ومينفعش يستسلم كدا بسهوله..

جاكي: دا مرض يااسيل... مينفعش يجرب ف المرض... هو خاف وقال افرض مقدرتش اوفرلها اللي هي محتاجاه.. وبصراحه بقاا.. انا مش شايفه انه غلطان ف حاجه.. هو مكنش يقصد بس معرفش يعبر ازاي..

اسيل: بس جرحني ياماما... حسيت اني مفرقش معاه او خاطري سهل عنده..

جاكي: حطي نفسك مكانه... دايما لما تقعي ف مشكله حطي نفسك مكان الشخص التاني... وشوفي كنتي هتعملي اي وقتها..

اسيل: والعمل دلوقتي..

جاكي: صالحيه..

اسيل: نعم!!... انتي كمان عايزاني اصالحه!!.. دا مكلفش خاطره يكلمني حتى..

جاكي: انتي مشوفتيش ابوكي عمل فيه اي..

اسيل: احييه.. بابا ضربه!

جاكي: ايوا ياختي.. والواد ياعيني لا اتكلم ولا نطق... وفضل ساكت وهو اصلا مش غلطان..

اسيل: طب هو فين دلوقتي.. انا عايزه اشوفه..

جاكي: كان ماشي بس انا منعته... ممكن تلاقيه تحت..

اسيل: هنزل اشوفه...

...........................

متيم: اعععع.. يابنت المفتريه حد يلعب كدا!

وعد: انت خرع كدا ليه ياض انت.. ماتجمد شويه..

متيم: دانا لو بلعب مع واحد صاحبي مش هيعمل فيا كدا..

وعد: انا مجتش جنبك ع فكره... انت بتتدلع.. وبعدين اخلص وقوم يلا..

متيم: لا مش قادر.. انتي كسرتيني وانا مش عارف العب عشان انتي بنت..

وعد: يجدع!!

متيم: اوومااال..

وعد: امم... طيب.. وادي قعده...

متيم: بقولك اي..

وعد: يانعم..

متيم: امتى هتتكلمي كدا زي باقي البنات..

وعد: يعني اي ان شاء الله.. اياك لساني معووج..

متيم: امم.. معووج ياوعد.. دا مش لسان اصلا..

وعد: احترم نفسك يابتاع انت..

متيم: اهو دا اللي انا بتكلم فيه.. عمري ماسمعتك بتقوليلي حبيبي مثلا..

وعد: حبك برص ياقليل الادب ياواطي يالمشمحترم انت.. حبيبي قال..

متيم: معرفش اي المر دا.. اووف..

وعد: انا مر!!... طب مش متجوزاك يامتيم.. روح شوف هتتجوز مين بقاا.. طب تلاق تلاته مانا متجوزاك.. هه

متيم: احسن بردو... كويس انها جت منك... مش شايفه رودي عامله ازاي..

وعد: ااه... قول انك مركز معاها بقاا...

متيم: امال هركز معاكي انتي!

وعد: ايووون... قول كدا بقاا.. دانت مقضيها.. وكمان زعلان عشان بقول ع عدي مز!!... طب اي رأيك ان عدي مز يامتيم.. مز وقمر كمان.. وهروح دلوقتي العب معاه واسيبك لوحدك زي كلب البحر كدا مع الست رودي بتاعتك..

متيم: لو قومتي من مكانك هقوم اجيبك من شعرك...

وعد: نينيني.. مش باخد رأيك انا قايمه فعلا..

قامت وهو قام وراها فطلعت تجري..

متيم: والله ماهسيبك..

.........................

عدي كان قاعد وباصص للبحر وسرحان..

اسيل نزلت وقعدت جنبه وهي ساكته.. بصلها ورجع بص للبحر تاني..

اسيل: مش عايز تقولي حاجه!!

عدي: اظن عرفتي..

اسيل: لي بتتخلى عني بسهوله كدا..

عدي: عشان راحتك.. اكتشفت ان متيم اخوكي عنده حق.. هو شايف ان فعلا انتي مش هتتأقلمي مع وضع غير وضعك... وكمان انتي تعبانه ومحتاجه راحه وكل حاجه تبقى جاهزه... واظن انتي هنا مرتاحه اكتر..

اسيل: امم.. عدي.. انا بحبك..

بصلها وعينيه بتلمع..

اسيل: بحبك انت ياعدي... مش عايزه حاجه تاني غيرك.. بس تخيلت ان مهما حصل هتتمسك بيا اكتر من كدا... وكمان انت مفهمتنيش انت هتسيبني ليه..

عدي: صدقيني مكنتش اقصد اجرحك ابدا... انتي عارفه انا بحبك ازاي..

اسيل: ودلوقتي!!

عدي: دلوقتي اي!

اسيل: لسه عايزني!؟

عدي: ااه.. اكيد.. بس..

اسيل: بس اي.. بردو خايف!

عدي: دا احسنلك يااسيل..

اسيل: مش فارق معايا حاجه... وبالنسبه لمرضي فَ اهلي متكفلين بالموضوع.. انت شاغل بالك ليه!!

عدي: يااسيل افهميني.. كل حاجه ملغبطه... وانا مش جاهز بأي حاجه.. حتى الشقه... لسه معنديش شقه ملكي يااسيل.. عشان كدا بفكر اسيب الجامعه.. عشان اشوف هدبر حياتي دي ازاي...

اسيل: هنحل كل حاجه سوا..

عدي: مش مضطره تستحملي الوضع اللي انا فيه..

اسيل: وانت مش مضطر تستحمل الوضع اللي انا فيه..

عدي: بلاش عناد..

اسيل: قولي اي مشكلتك ياعدي.. اي اللي واقف قدامك..

عدي: مصاريف علاجك مثلا..

اسيل: اهلي عليهم الحوار دا..

عدي: متخيله اني لو اتجوزتك هخلي اهلك يصرفوا عليكي وانتي ف بيتي!!

اسيل: بس حرام انت تشيل حاجه زي دي..

عدي: لا.. انتي هتبقي ملزومه مني.. وانا مقبلش ان حد يصرف ع مراتي.

اسيل: هشتغل انا وانت ياعدي.. هنشتغل وكل حاجه هتتحل... بس نحاول..

عدي: الشقه!!... انتي المفروض متعوده تعيشي ف ڤلل... مش ف شقق.. مابالك بقاا معنديش شقه ملك..

اسيل: ايجار.. اي المشكله..

عدي: هتقعدي ف شقه ايجار!!

اسيل: ايوا.. ولو ربنا كرمنا اكيد هننقل ف حاجه احسن..

عدي: امم.. اسيل.. مش مضطره تضحي بأي حاجه..

اسيل: انا حابه كدا.. انا حابه ابقى معاك ف اي مكان وع اي حال... كفايه انك هتبقى موجود... وبالنسبه لموضوع الفرح انا مش عايزه فرح... ولو لابد من حاجه زي كدا فَ ممكن نعمل عمره بفلوس الفرح ياعدي... ومعنديش مشكله تاخدني من بيت باب ع بيتك ع طول.. ولما ربنا يكرمنا نعمل احسن فرح ف الدنيا... وبالنسبه للطبخ.. هو انا مبعرفش اطبخ بصراحه... بس هتعلم معاك وعشانك.. عدي انا بس عايزه اقولك ان كل حاجه محلوله.. بس حاول عشاني.. وبعدين مش يمكن اصلا مش قاعدلي كتير!..

عدي: بعد الشر.. اي اللي بتقوليه داا.. هتخفي وهتقومي بالسلامه عشاني..

اسيل: قولت اي..

عدي: امم.. ابوكي مش طايقني دلوقتي..

اسيل: باين ع وشك بصراحه..

عدي: كسر عضم وشي.. انا بعد كدا هخاف ازعلك لايطلع روحي ياختي..

اسيل: بعد الشر عليك... وبعدين صحيح...كنت بتعمل اي مع رودي..

عدي: فين دا..

اسيل: لما سيبتك وطلعت..

عدي: احم.. ااه.. قالتلي تعالى نتمشى شويه..

اسيل: يعني انت مزعلني وانا قاعده اعيط وانت قاعد تتمشي معاها!!..

عدي: هفهمك..

اسيل: تفهمني اي ياللي تنشك ف معاميعك انت.. انت مش ناوي تجيبها لبر يعني!!... وبعدين انت عارف هي وامها بيحاولوا يعملوا اي.. وكمان بتساعدهم ع دا!!... اسمع ياض انت.. لو شوفتك واقف معاها تاني ولا بتبصلها بس، صدقني هقطع وشك انت وهي.. انا مش ناقصه قرف.. انت فاهم ولا لا..

عدي: بالعه راديو!!.. ماتهدي.. وبعدين رودي مين دي اللي ابصلها.. يعني اسيب القمر وابص ع دي!!.. تيجي ازاي!

اسيل: بتثبتني صح!!

عدي: تؤتؤ.. بحبك..

اسيل: امم.. ماشي.. هعديها المرادي.. بس المره الجايه هتزعل مني قوي..

عدي: مفيش مره جايه..

اسيل: ولا حتى ترد عليها لما تكلمك..

عدي: حاضر.. اهم حاجه تبقي انتي مرتاحه.. ولو عايزاني اغمي عيني طول الوقت معنديش مشكله... المهم بس انتي تبقي راضيه عني ياست البنات..

بصوا لقوا شهد نازله من فوق ومتعصبه..

شهد: كان معايا حق لما قولتلهم انك من الشارع..