رواية قلبي ليس بيدي الفصل التاسع والخمسون 59 بقلم حسناء مصطفي

رفعت وشي وانا ببصلها بصدمه...

ماما: لو كنتي فاكره اني عشان كنت بعيده عنك ولسه راجعالك، هتساهل معاكي واسيبك ع حل شعرك، تبقي غلطانه...

جاكي بصدمه: انتي بتضربيني!!

ماما: واكسر دماغك كمان... بتعملي اي عنده

من الليل!! هاا.. ردي.. دخلتي عنده ليه وقعدتي كل دا..

جاكي بصدمه: انتي بتقولي اي!.. انتي شاكه فيا!!.. انا!

ماما: ومشكش ليه!!... انتي واحده طالعه من غير ام تعلمك الصح والغلط... لو كنتي نسيتي طبعي افكرك..

مقبلش ابدا ان بنتي تبقى مع واحد غريب ف اوضته ف نص الليل.. والله اعلم بيعملوا اي..

جاكي: انتي واعية انتي بتقولي اي!!... انتي شايفه ان انا كدا!!..

ماما: قوليلي كنتي بتعملي اي عنده!!

جاكي: ياماما هو كان... كان تعبان.. وانا دخلت اهديه..

ماما: وانتي مالك انتي.. مايتعب ولا يغور ف داهيه.. انتي مالك!!.. ازاي تدخلي عنده ف وقت زي دا!!

جاكي: اتطمني ياماما مفيش حاجه من اللي ف دماغك حصلت.. ولا هتحصل... عشان اللي احنا شوفناه وبنمر بيه، اكبر من الافكار اللي ف دماغك دي...

ومش فاضيين اصلا نفكر ف اي حاجه وحشه... داحنا مش ملاحقين ع المصايب...

وبعدين انا بدخل عنده وانا متطمنه ع الاخر... عارفه ليه!!... عشان هو بيخاف عليا... بيخاف عليا اكتر من خوفي ع نفسي... عارفه.. بيخاف عليا اكتر من خوف بابا عليا.. واكتر من خوفك انتي كمان....

جاك اخر واحد ف الدنيا ممكن يإذيني او يبصلي بنظره مش كويسه... دا هو اللي بيتعصب عليا لو اتمايعت ولا عملت حاجه...

ماما: لازم تقولي كدا.. مانتي متنيله ع عينك بتحبيه... طب اي رأيك ان انا غيرت رأيي.. ومش موافقه على دي جوازه.... لما انتي دخلتي اوضته وقعدتي معاه للصبح وانا موجوده... امال وانا غايبه كنتي بتعملي اي!!... هو دا حب!!... ولا هو دفعلك ياجاكي!!

جاكي:دفعلي!!!..لا مش عشان دفعلي و لا عشان بحبه... عشان هي دي الحقيقه... عشان هو فعلا بيتقي ربنا فيا... كنت قدامه اكتر من مره.. ولو كان عايز يعمل فيا حاجه كان عمل.. ومكنش حد يقدر يقوله كلمه... عارفه ليه!!... عشان هو بيعمل اللي هو عايزه باشاره واحده.. مش بيخاف من حد ولا من حاجه...

دا غير اني كمان مليش اهل... ابويا نفسه رماني.. وانتي مسألتيش عني وسيبتيني معاه... كنت بطولي معاهم...

لو كان عايز يضرني كان عمل كدا...

كنت قدامه عريانه... من غير هدوم... لما كنت مخطوفه... كانت نظراته وقتها عباره عن خوف وغيره عليا عشان بالمنظر دا قدامهم...

جاك اكتر حد وقف معايا وحماني وكان ضهر ليا... مع اني واحده غريبه.. من الشارع بمعنى اصح... وقف قدام امه عشاني... مسمحش لامه تهيني ولا تزعلني..

طردها من البيت عشان حاولت تضرني...

لما كنت مخطوفه اول مره.. ادم دخل عليا وكانت هدومي مقطعه.. مكنش يعرفني وقتها.. كان قادر يعمل فيا اي حاجه هو عايزها.. بس معملش..

مفيش حد ف دماغه الافكار دي غيرك....

احنا مش لاقيين وقت اصلا عشان نفكر ف حاجه زي كدا...

ماما: مهما قولتي.. طلاما سمح انك تباتي معاه ف نفس الاوضه، عمري ماهوافق عليه... ولا هتطمن عليكي معاه..

جاكي: لا ياشيخه!!... بقولك كنت قدامه عريانه... وبروح معاه ف عربيته كل حته... لو جاك كان حد وحش مكنش زماني واقفه قدامك كدا دلوقتي...

جاك عمل كتير قوي عشاني.. وانا واحده غريبه عنه... دافع عني ووقف قدام ابويا ومحمود... مستحملش حد فيهم يقول عليا كلمه وحشه...

مش هتطمني عليا معاه ازاي اذا كنت انا نفسي متطمنه ع نفسي معاه من غير جواز... فمابالك بقاا لما يبقى جوزي...

تقدري تقوليلي بقاا انتي عملتي اي عشاني!!

سيبتيني لابويا... حتى لو هو اللي رماكي... عدى وقت كتير قووي... كنتي هتقدري تلاقيني...

بس انتي محاولتيش... حاولتي ف الاول وبعد كدا خلاص... سنين طويله عشتها لوحدي... كنتي فين انتي!!... مرجعتيش القاهره ليه ودورتي عليا!!... مرجعتيش بيتنا ليه!!... مسالتيش صحابي ليه!!

اقولك انا ليه!!... انتي خوفتي... خوفتي ع نفسك.. كنتي خايفه احسن ابويا يعمل فيكي حاجه... انا عارفه دا كويس.. بس مرضتش افكر ف الحاجات دي عشان مضيعش فرحتي برجوعك... لولا جاك كان زماني ميته..

ماما.. انا بحب جاك.. وهتجوزه... سواء وافقتي او لا..

عشان بعد اللي قولتيه دلوقتي مبقتيش تفرقي معايا.. ولو عايزه ترجعي.. اتفضلي.. مش هستنى حد فيكوا بعد كدا.. بيعيني تاني وامشي...

كانت واقفه بصالي بصدمه ودموعها بتنزل.. وانا كنت متعصبه وصوتي عالي...

جاكي بعياط: انتي مش متخيله انا استنيتك قد اي.. وكنت مبسوطه برجوعك قد اي... مش ذنبي اني طلعت من غير اهل.. مش ذنبي انكوا اهل مش كويسين.. دا ذنبكوا انتوا... وانا فخوره بكل حاجه عملتها ومش ندمانه ع حاجه... لاني قدرت احافظ ع نفسي وانا لوحدي.. وانا مليش حد.... واقدر اعيش من غيرك تاني عادي..

ماما: انا صحيح بطلت ادور عليكي من زمان.. وفعلا عشان كنت خايفه من ابوكي... لانك مش متخيله هو عمل فيا اي..

جاكي: تقومي تسيبيني معاه!!... كنتي عارفه انه تاجر مخدرات وسيبتيني معاه!!.. كنتي عارفه ان محمود مش سايبني ف حالي وسيبتيني... خوفتي ع نفسك...

انا وضعي اي!!.. المفروض افرح برجوعك ولا ازعل ع اهلي اللي مش بيفكروا غير ف نفسهم...

ماما: واديني رجعتلك... وهعيش انا وانتي بس.. وهعوضك عن كل اللي حصل...

جاكي: انتي كدا عوضتيني فعلا... شايفه ان انا واحده بيتدفعلها...

انتي مش متخيله كلمتك دي عملت فيا اي...

ياريتك مارجعتي... ياريتني فضلت عايشه مستنياكي.. احسن من الصدمه اللي انا فيها دي..

ماما: انا مش قصدي حاجه يابنتي... انا ام.. ام وخايفه ع بنتها... وانا مش بآمن لاي راجل..

جاكي: مش ذنبي.. مش ذنبي انك معرفتيش تختاري... مش معنى انك فشلتي ف حياتك يبقى انا كمان هفشل... متحملنيش انا نتايج فشلك...

ماما بعصبيه: واضح انه واكل دماغك ع الاخر.. حقه.. مانتي بقالك كتير معاه... وانتي هبله وماصدقتي... واحد مفهمك انه بيحبك وبيموت فيكي... تقدري تقوليلي هيحبك ع اي!!... ويثق فيكي بتاع اي!!... لما هو عرف كل حاجه عن ماضيكي.. وعرف حقيقة ابوكي... اي حد عاقل لما هيعرف انك كنتي عايشه مع ابوكي لوحدك وابوكي بالشكل دا، مش هيثق فيكي.. هيبقى شاكك اذا كان في حاجه حصلت ولا لا... مش هيثق اذا كنتي بنت اصلا ولا لا.... مفيش حد هيقبل ع نفسه انه يعيش مع واحده هو مش واثق اتعمل فيا اي...

افهمي بقاا... دا بيضحك عليكي.. بيستغلك وبيستغل حبك....

هيحبك ع اي ياجاكي!!.. يابنتي مسيره ف يوم هيجرحك... هيجرحك ويقولك كلام يزعلك...

صوتنا كان عالي... بصيت لبرا لقيت جاك وفيروز واقفين قدام الباب وشايفينا...

اول ماشافته مشت عليه ودخلته...

ماما: اسمع... انت تبعد عن بنتي.. تبعد عنها خالص... انا بنتي مش بتاع الكلام دا... مش كل شويه هتعمل عليها الشويتين دول وتستغلها... انا مش موافقه ع جواز... انا هاخد بنتي وامشي... ومتشكرين جدا ع وقوفكوا معاها... بس انا مش هشوف الغلط واقف اتفرج..

وانتي.. اتفضلي لمي هدومك عشان هنمشي.. مش هسمح انك تقعدي معاه ف بيت واحد تاني..

فيروز: كدا يامنى!!... متخيله اني هسمح لجاك انه يضرها!!.. ولو انا شايفه ان جاك مش كويس، كنت هخليه قريب منها!!

منى: مش هتحسي بيا يافيروز... انا بنتي طول عمرها بعيد عني... طول السنين دي بفكر اي اللي اتعمل فيها... مش معقول هرجع واشوفها بتعمل كدا واقف اتفرج.. انا مهما كان ام وخايفه ع بنتي..

فيروز: ليكي حق تخافي عليها... بس مش من حقك تهينيها ولا تتهميها ف شرفها يامني... لما انتي امها وقولتي كدا.. امال احنا نقول اي...

جاكي معانا بقالها كتير قووي.. عمر ماحد فينا قالها كلمه تمس شرفها... كلنا شايفينها ست الناس كلهم.. والدليل ع دا ان كلنا فرحنا اول ماعرفنا ان جاك بيحبها وهيتجوزها...

وكمان مش من حقك تحكمي اذا كان جاك كويس او لا...

منى: يعني انتي عايزاني اشوف بنتي بايته مع راجل غريب ف اوضته واقعد ساكته!

فيروز: مع اني معرفش هي دخلت عنده ليه، بس مش محتاجه اعرف... عشان انا واثقه فيها.. ومع اني عارفه ان جاك مستحيل يضر بنت مين ما كانت، بس انا واثقه فيا هي اكتر منه.. حتى لو هو طلب منها حاجه.. هي اللي هتسيبه ومش هترجعله مهما عمل... احمدي ربنا ان بنتك قدرت تحافظ ع نفسها لحد دلوقتي.. واحده غيرها كان زمانها ماتت..

منى: تمام.. انا دلوقتي عايزه اعرف انتي كنتي بتعملي اي جوا.. ريحيني ع الاقل..

جاكي: كنت نايمه معاه...

بصتلي بصدمه..

جاكي: مش دا اللي انتي عايزه تسمعيه!.. مش انتي عايزه تثبتي كدا!.. خلاص.. انا بقولك.. اهو.. كنت نايمه معاه...

منى: انا مش عايزه اثبت حاجه.. انا خايفه عليكي..

جاكي: مش عايزاكي تخافي عليا.. ولو وجودك ف حياتي هيبقى عباره عن شك، فانا مش عايزاكي انتي كمان... مش هستحمل ذُلكوا تاني...

منى: دخلتها اوضتك ليه ياجاك!!... ليه عايز تحرق قلبي عليها!

جاك: انا مش فاكر انها كانت ف اوضتي اساسا..

منى: كمان!!

جاكي: مكنش واعي.. واظن اني قولتلك انه كان تعبان.. مكنش واعي اني جنبه اصلا عشان يفكر يعمل حاجه..

منى: ماشي.. بس دا ميمنعش اننا هنمشي..

جاكي: لا مش همشي..

منى: يعني اي!!.. مش عايزه تبقي معايا!!

جاكي: انا عايزه جاك... مش عايزه حد غيره.. كنتي انتي اغلى حد عندي.. اغلى منه هو.. وممكن اتخلى عنه عشانك.. بس دلوقتي لا.. دلوقتي انا مليش غيره..

ع الاقل هو الوحيد اللي لسه مقاليش كلمه وحشه...

جاك: اسمعيني.. لو خايفه ع وجود بنتك معايا عشان مش واثقه فيا، فانا مستعد اتجوزها دلوقتي حالا... مستعد اثبتلك حالا اني عايزها وشاريها...

منى: بس انا مش موافقه... مش عايزاك انت تتجوزها... انا عارفه... مسيرك هتجرحها..

جاكي: حتى لو جرحني... مش هيبقى اكبر من جرحي منك... ولا من بابا... جرحه هيبقى اهون بكتير..

منى: هتتجوزيه حتى لو انا مش موافقه!

جاكي: ايوا..

مني: ماشي.. اتجوزيه.. بس مش هتشوفي وشي تاني..

طلعت راحت اوضتها وفيروز طلعت وراها...

جاك بصلي شويه وبعدين سابني ومشي...

قفلت الباب وقعدت اعيط....

ـــــــــــــــــــــــــــــــــــــــــــــــــــــــــــــــ

هند: ماما احنا رايحين الجامعه.. هي جاكي فين!

فيروز: لا جاكي مش هتروح النهارده.. روحوا انتوا..

نور: ليه مالها...

فيروز: ملهاش.. روحوا انتوا وخلوا بالكوا من نفسكوا..

مشوا ومحمد مشي معاهم وجاك خرج...

ماما كانت بتلم هدومها وماشيه وفيروز طلعلتها...

فيروز: يعني هي الامور بتتحل كدا يامنى!

منى: اعمل اي يعني!

فيروز: طب اقعدي ونتكلم بالعقل..

منى: مبقاش في عقل خلاص... البت مفكره نفسها بتفهم اكتر مني..

فيروز: اقعدي واسمعيني..

منى: نعم!!.. هتدافعي عنها تاني!

فيروز: انتي فعلا مقتنعه باللي بتقوليه!!... فاكره انك كدا بتحميها!!.. حرام عليكوا والله... البت مشافتش يوم واحد عدل ف حياتها... لازم كل ماتيجي تفرح يحصل حاجه تنكد عليها..

دي يتيمه يامنى.. طالعه من غير ام.. واديكي شايفه ابوها... كتر خيرها قوي ع اللي هي مستحملاه... ويوم ماربنا يرزقها بحد يحبها ويخاف عليها، تيجي انتي تقوليلها لا!.. اي المشكله لما تتجوز واحد بتحبه!!... مش واثقه فيه!!... انا بقاا واثقه.. وبقولك ان جاكي مش هتلاقي حد يخاف عليها ويحبها قد جاك... مش عشان جاك ابني لا.. عشان جاكي زي بنتي.. واكيد مش هخليها تتجوز حد وحش....

وبعدين ياست دي كانت طايره بيه... ليه تكسري قلبها كدا!... وبعدين هو في واحده تتهم بنتها ف شرفها بردو!

منى: معرفش بقاا.. ماهي عصبتني.. دخلت اوضته ف نص الليل وخرجت الصبح.. ولما سألتها تقولي مكنتش بعمل حاجه.. طبيعي اني اشك يافيروز..

فيروز: طب افهمي الاول في اي وبعدين حددي..

جاك بنفسه قالك انا مش فاكر انها جتله الاوضه..

منى: يعني اي مش فاكر!!.. يعني كان سكران مثلا!!... ماهو دا انيل..

فيروز: لا مكنش سكران... بس جاك بتجيله حاله كدا ومبيبقاش ف وعيه... مش بيبقى عارف اي اللي بيحصل حواليه اصلا...

يامنى جاك اكبر من الافكار اللي ف دماغك دي.. دا اخر واحد ف الدنيا ممكن يإذيها... دول شافوا الموت مع بعض... كل حاجه وحشه حصلتلهم مع بعض... انتي كدا بتخسري بنتك.. ومش هي اللي غلطانه... ممكن يكون معاكي حق ف حكاية انها متدخلش اوضته مع اني عارفه ان في سبب قوي يخليها تعمل كدا... بس ع الاقل فهميها بالراحة... مش تتهميها بالشكل دا..

انا عملت اللي عليا وقولتلك.. وانتي براحتك..

سابتها ونزلت وهي قعدت مكانها ع السرير...

ـــــــــــــــــــــــــــــــــــــــــــــــــــــــــــــــ

هند: هو في اي!

نور: مش عارفه.. بس انا كنت سامعه جاكي ومامتها بيتخانقوا بس مش عارفه ليه..

هند: هي لحقت!..

نور: انا مش عارفه الدنيا كل ماتظبط شويه تروح تبوظ تاني ليه...

هند: ساكت ليه يامحمد!

محمد:.....

هند: محمد..

محمد: نعم..

هند: سرحان ف اي.. بقولك ساكت ليه..

محمد: عادي يعني.. يلا انزلوا..

نزلوا وهو راح جامعته...

ـــــــــــــــــــــــــــــــــــــــــــــــــــــــــــــــ

عمو احمد: في اي يافيروز!..

فيروز: منى ياسيدي..

عمو احمد: مالها!

فيروز: مش راضيه توافق ع الجواز..

عمو احمد: خلاص ياجماعه... هو مش بالعافيه..

فيروز: يعني هي تسيب بنتها كداا طول السنين دي... ويوم ماربنا يرزقها بحد يحبها، تروح تيجي تنكد عليها!!.. وبعدين جاكي موافقه وعايزاه.. معرفش اي التصميم دا..

عمو احمد: انا والله مابقيت فاهم اي اللي بيحصل دا..

ـــــــــــــــــــــــــــــــــــــــــــــــــــــــــــــــ

ـ يافندم الشغل واقف... وفي مواعيد كتير النهارده.. وحضرتك بتلغي كل حاجه..

جاك: مش مالك موجود!

ـ يافندم في حاجات مينفعش الاستاذ مالك هو اللي يعملها...

جاك: خلاص... شوفي في اي النهارده وانا موجود..

ـ يعني ابلغهم ان المواعيد زي ماهي!

جاك: ايوا..

ـــــــــــــــــــــــــــــــــــــــــــــــــــــــــــــــ

كنت لسه قاعده مكاني ف اوضتي..

فيروز دخلت..

فيروز: مش هتاكلي ياجاكي!

جاكي: لا..

فيروز: معلش يابنتي.. مش عارفه اقولك اي والله..

جاكي: متقوليش.. الظاهر ان انا مليش نصيب افرح..

فيروز: ان شاء الله خير.. انا هقعد معاها تاني وهحاول..

سابتني وخرجت وانا قعدت اعيط... حتى جاك مكلفش خاطره وقالي حاجه...

عدى الوقت وانا لسه مكاني... البنات رجعوا ومحمد دخل اوضته...

الباب خبط..

جاكي: ادخل..

هند ونور دخلوا...

هند: قاعده لوحدك ليه!

جاكي: عادي..

نور: لسه مامتك مصممه!

جاكي: ايوا..

هند: طب هي ليه رافضه!.. والله ماهتلاقي احسن من جاك ابدا..

جاكي: عارفه... بس هي عايزاني افضل جنبها...

نور: ان شاء الله هتوافق.. فكي انتي بس..

سابوني وخرجوا وانا نمت ع السرير بس منعستش...

فضلت كدا لحد الليل وهما يطلعوا ومرضاش انزل معاهم..

قعدت شويه وبعدين جتلي مسدج...

فتحت لقيته جاك..

جاك: انزلي..

شوفتها ومردتش...

جاك: جاكي انزلي انا تحت..

جاكي: مش عايزه انزل...

جاك: انزلي طيب نتكلم..

جاكي: مش عايزه..

جاك: جاكي اخلصي...

قفلت الفون ونزلت لقيته واقف بره..

جاكي: نعم!

جاك: انتي قالبه وشك فيا ليه!

جاكي: مش قالبه ولا نيله..

جاك: طب تعالي نتمشي شويه..

جاكي: مش عايزه..

جاك: امشي قدامي..

جاكي: اوووف...

مشيت وهو مشي جنبي وفضلنا ماشيين ساكتين..

جاك: مالك!

جاكي:....

جاك: يابنتي في اي!

جاكي: مفيش..

جاك: يااااربي... امال قالبه وشك فيا ليه!.. انا مالي!

جاكي: انت مالك فعلا..

جاك: طب مامتك واتخانقتي معاها.. زعلانه مني انا ليه!

جاكي: الا ماكلفت خاطرك وقولتلي كلمه... ولا بعتلي مسدج حتى.. سيبتني ومشيت ولا كإني بعيط قدامك.. وجاي دلوقتي تقولي مالك!

جاك: امم.. انتي مش شايفه مامتك رافضاني ازاي!

جاكي: ودا يمنع انك تسأل عليا ولا تهديني!!

جاك: انا مشيت عشان مبوظش الدنيا اكتر.. وبعدين انتي جيتي اوضتي امبارح ليه!

جاكي: انت مش فاكر!

جاك: لا..

جاكي: وايدك دي.. مش عارف مين لفها!!

جاك: مانا بسألك ياجاكي.. جيتي ليه.. انا عملت اي خلاكي تيجي!

جاكي: انا كنت ف اوضتي وسمعت حاجات بتتكسر ف اوضتك.. دخلت لقيتك قاعد ع السرير وايدك متعوره... لفيتهالك وبعدين انت نعست وفضلت متبت فيا وانا معرفتش اخرج... ولما روحت اوضتي الصبح كانت ماما موجوده فيها..

جاك: انا قولت حاجه وقتها!!

جاكي: ايوا..

جاك بخوف: قولت اي!

جاكي: قعدت تقول دبحوهم وكدا..

جاك: يانهار اسود..

جاكي: جاك.. هما مين اللي دبحوا مصطفى ومامته.. وازاي.. انا مش فاهمه حاجه..

جاك: حد عرف الكلام دا!

جاكي: لا طبعا..

جاك: جاكي ارجوكي.. اوعى حد يعرف كلمه من اللي انا قولته.. كإنك مسمعتيش حاجه..

جاكي: حاضر.. بس انا عايزه افهم..

جاك: بعدين.. بس دلوقتي خلينا ف موضوعنا..

جاكي: جاك..

جاك: امم..

جاكي: لو ماما فضلت مصممه... هتعمل اي!

جاك: انتي اللي تقولي.. مش انا... لو انتي موافقه انا معنديش مشكله... انا عن نفسي اقدر اخدك دلوقتي حالا ونروح نتجوز ومحدش هيقدر يكلمك..

جاكي: بس انا مش عايزه كدا..

جاك: مانا سايبك عشان انتي تقرري.. شوفي انتي عايزه اي..

جاكي: معرفش...

جاك: طب هي رافضه عشان كنتي معايا!.. يعني مفيش سبب تاني!

جاكي: معرفش.. هي مش بالعه الحوار كله من الاول اصلا... هي وافقت بس عشان انا زعلت...

جاك: لو هي زعلانه عشان انتي كنتي معايا.. انا ممكن اروح اعتذرلها...

جاكي: لا.. تعتذر ليه!.. انت معملتش حاجه غلط عشان تعتذر لحد..

جاك: بس دي مامتك ياجاكي.. واكيد خايفه عليكي مش اكتر..

جاكي: انا كان ممكن اعتذرلها واقولها ان دا مش هيتكرر تاني مع اني معرفش اي الغلط اللي عملته... بس هي معطتنيش فرصه اقول حاجه.. هي اصلا نهت اي حاجه جوايا ليها..

جاك: يعني اي!.. بقيتي بتكرهيها!

جاكي: لا مش بكرهها.. انا بس مبقتش حاسه بنفس الفرحه... يعني اتصديت من ناحيتها..

جاك: جاكي.. مش عايز ابقى سبب ف مشاكل بينك وبين مامتك.. انتي ملكيش غيرها.. ومينفعش اخليكي تخسريها..

جاكي: مش بسببك... كل واحد بيرمي كلام وهو متعصب... واللي هي قالته مستحيل انساه..

جاك: هي اكيد مكانتش تقصد..

جاكي: مش فارقه...

جاك: الحوارات كترت... بصي.. هي لو ربنا ارادلها يعني ووافقت، هنتجوز ع طول.. شايف ان ملهاش لازمه الخطوبه.. ولا انتي اي رأيك!

جاكي: يعني هنتجوز ع طول!.. من غير خطوبه!

جاك: هي مش الخطوبه دي للتعارف!!... هو انتي لسه معرفتنيش!!.. وبعدين كل مابنأخر كل مابيحصل مشاكل... بس ف الاخر براحتك يعني..

جاكي: يعم نتنيل ولا نتزفت.. المهم توافق الاول..

جاك: هتوافق.. متقلقيش..

جاكي بتنهيد: ماشي... يلا نرجع بقاا عشان ميدوروش علينا...

جاك: عارفه.. انا عايز نتجوز بسرعه عشان الحوار دا.. عشان محدش هيقدر يتكلم ولا يقول روحتوا فين ولا جيتوا منين.. هتبقي مراتي وهلف بيكي زي مانا عايز..

جاكي: امم.. قول يارب..

رجعنا ولقيناهم كلهم تحت...

فيروز: كنتوا فين!

جاكي: كنا بنتمشى...

ماما: تعالي طيب..

روحت قعدت جنبها...

ماما: لسه زعلانه مني!

جاكي: وهزعل ليه!.. المفروض كنت اتوقع كدا اصلا..

ماما: طب حقك عليا متزعليش.. انا موافقه ياستي..

جاكي: معلش ياماما.. بس سواء وافقتي او لا انا كنت هتجوزه..

بصتلي بزعل...

جاك: معلش.. هي بس متضايقه من اللي حصل..

فيروز: يعني كدا خلاص موافقه!

ماما: ايوا...

جاك: طب بما ان حضرتك موافقه.. احنا كنا بنقول اننا هنعمل الفرح ع طول... يعني بلاش خطوبه..

عمو احمد: ودا كلام!.. هو في جواز من غير خطوبه!

جاك: الخطوبه للتعارف.. واظن انا وهي عارفين بعض كويس... وبعدين كل مابنأخر بتحصل حاجه جديده تبوظ الدنيا...

ماما: ايوا بس انا عايزه بنتي تعمل خطوبه الاول...

جاكي: جاك.. عمتا قاعد شهر ع امتحاناتي.. نتخطب ع مااخلص السنه دي.. وبعدين نتجوز ع طول..

جاك: تمام.. موافق.. اي رأيك ياطنط!

ماما: ماشي... بس احنا لسه متفقناش ع حاجه..

جاكي: حاجة اي اللي تتفقي عليها!

ماما: دا جواز ياجاكي.. اكيد في حاجات هنتفق عليها.. امال هتروحي كدا وخلاص!

بصيت لقيت فيروز بتزغرط...

فيروز: زغرطوا يابنات... ادخلي يابت هاتي الشربات..

جاك: استني يافيروز لما نخلص كلام..

فيروز: ياواد استنى لما نشرب الشربات الاول...

عطيات جابت الشربات وقعدوا يزغرطوا.. بس جاك لاحظ اني قاعده مكشره..

جاك بصوت واطي: فكي وشك دا..

عمو احمد: طب نقرأ الفاتحه بدايةً كدا.. وبعد كدا نتفق...

قروا الفاتحه وفيروز والبنات بيزغرطوا..

عمو احمد: نقدر نتكلم ف التفاصيل دلوقتي لو حابه..

ماما: معنديش مشكله..

جاك: انا تحت امرك ف اي حاجه.. شوفي حضرتك عايزه اي وانا موافق..

عمو احمد: طب تمام.. خير البر عاجله... اعرفك عليه الاول... جاك شغال رجل عمال.. وعنده شركاته الخاصه.. عنده اكتر من عربيه... وبالنسبه للشقه شوفي حضرتك تحبي اي.. او جاكي تحب اي..

ماما: هتقعدها فين!

جاك: تختار الڤيلا اللي تعجبها.. ولو معجبهاش حاجه او في ف دماغها حاجه معينه، تتعمل حالا..

ماما : كويس... ابقوا شوفوا الموضوع دا مع بعض..

عمو احمد: بالنسبه للمهر والشبكه...

ماما: انا مقدرش احدد.. شوفوا انتوا ناويين ع اي..

جاك: 500 الف مهر... الدهب ٢٥٠ جرام مثلا... المؤخر 2 مليون.. اي رأيك.. ولو شايفه دا قليل.. شوفي حضرتك تحبي اي..

جاكي: حيلك حيلك... اي العك دا.. انا مش عايزه كل دا..

جاك: ليه!

ماما: لا دا كتير يابني.. انا مش هاممني فلوس.. انا بس بتكلم ف التفاصيل عادي... انما ليه دا!

جاك: انا معنديش مشكله ادفع اللي انتوا عايزينه... المهم تكونوا مرتاحين...

جاكي: لا دا كتير قوي..

جاك: مفيش حاجه كتيره عليكي... ومستعد ادفع اكتر من كدا.. شوفي انتي عايزه اي..

جاكي: ومين قالك اني عايزه فلوسك!!... اللي يشوف كدا يقول اني موافقه عشان فلوسك... وبعدين ٢٥٠ جرام ليه!!.. انت اصلا جبتلي خاتمين.. دول كفايه..

جاك: اي اللي بتقوليه دا!!.. الكلام دا لو انتي اللي طالبه

... وانتي مطلبتيش حاجه.. انا اللي قولت... وبعدين الخاتمين دول مني ليكي عادي... ملهمش دعوه بالدهب...

جاكي: وانا مش عايزه كل دا...

جاك: طب عايزه اي..

جاكي: معرفش.. انا مش عايزه دهب.. انتي جبتلي خاتمين غاليين قوي.. دول الماز ياجاك.. كمان عايز تجيب تاني!!

جاك: جاكي.. قولي عايزه اي وانا معاكي...

جاكي: بقولك اي.. مش عايزه حاجه.. انا طالعه اوضتي...

سيبتهم وطلعت...

جاك: معلش.. هي هبله شويه..

فيروز: واضح انها لسه متضايقه...

منى: مانا وافقت اهو.. اعمل اي تاني!

جاك: متعمليش.. انا هصالحها..

فيروز: اطلعلها ياجاك وعمك يشوف هنتفق ع اي..

ماما بصتلها...

فيروز: اطلع ياجاك.. اطلع البت مش عارفه تفرح..

جاك: ماشي..

قعدوا يتفقوا ف الباقي وانا كنت قاعده ف اوضتي اعيط...

الباب خبط.. مردتش.. راح فتح ودخل..

جاكي: اطلع بره..

جاك: ماتتلمي يابت انتي..

جاكي: ياعم اطلع انا مش عايزه اكلم حد انا..

جه قعد قدامي..

جاكي: مبتسمعش!!!... قولتلك امشي..

جاك: بس يابت..

قلع الكوتشي ورقد ع السرير...

جاكي: انت بتعمل اي..

جاك: بس بقاا.. اسكتي..

جاكي: قوم يلا اطلع بره عايزه انام..

جاك: انتي هبله!.. هل انتي هبله!.. يعني انا بطلب ايدك وانتي تسيبيني وتطلعي!...

جاكي: مانت ضايقتني..

جاك: هو انا قولت حاجه غلط!

جاكي: اي كل الفلوس دي.. مش محتاجه كل دا.. ولا انا عايزه الهري دا كله...

جاك: وانا قولتلك موافق وشوفي انتي عايزه اي..

جاكي: معرفش بقاا.. فكك مني وروح انزل..

جاك: يارب صبرني.. انتي مش كنتي عايزه نتجوز!!.. واخيرا مامتك وافقت اهي.. متضايقه ليه دلوقتي!... وبعدين قاعده تعيطي ليه!

جاكي: انا مقفوله من الموضوع كله..

جاك: امم.. مبقيتيش عايزاني يعني..

جاكي: مقولتش كدا..

جاك: مانتي بتقولي اهو..

جاكي: معرفش..

جاك: لو ملمتيش نفسك هزعلك..

جاكي: يعم انزل بقاا.. انا مش هتجوز.. خلاص قفلت معايا..

جاك: ياراجل!!.. طب تمام.. مايا كانت بترن هروح اشوفها و..

جاكي: يمين بالله ياجاك ماهيطلع عليك صبح لو دا حصل..

جاك: انتي مش لسه قايله مش عايزه جواز!.. خلاص بقاا

جاكي: لا عايزه.. انت اللي مابتصدق..

جاك: طب خلاص بقاا.. بطلي دلع ويلا ننزل...

جاكي: مش نازله اناا..

جاك: ياجاكي انا من الصبح ف الشغل ومش قادر والله..

جاكي: هما بيعملوا اي تحت!

جاك: بيتفقوا ع اللي هيحصل..

جاكي: محسسيني اني عربيه.. قاعدين تبيعوا وتشتروا فيا...

جاك: عايزاني اتجوزك من غير لا مهر ولا شبكه ولا نيله ع دماغك!!

جاكي: انا مش عايزه اتجوزك اصلا..

جاك: طب عيني ف عينك كدا..

جاكي: لا..

جاك: ايوا.. عشان بتحبيني..

جاكي: محصلش.. انا مش بطيقك اصلا..

جاك: طب تمام.. في ناس تانيه بتطيقني.. هروح اشوفهم وبع...

جاكي: اترزع مكانك يالااااا...

جاك: مانتي لو فضلتي بالبوز دا همشي... انا مش ناقص نكد... فكي بقاا وخلي ليلتك تعدي..

نام تاني ع السرير...

جاكي: ياسطا...

جاك: امم..

جاكي: عايزه اندومي..

قام بصلي شويه كدا..

جاكي: اي!

جاك: هو انتي طبيعيه!!

جاكي: ايوا..

جاك: لا والله ماطبيعيه... انتي في حاجه ف دماغك اكيد... وقعتي ع دماغك وانتي صغيره!!.. يمكن دا اللي مخلي نسبة التخلُف عندك عاليه..

جاكي: لم نفسك بدل والمصحف هفتح دماغك..

جاك: افتحي.. اديني قدامك اهو.. اسكتي بقاا بطلي وش..

جاكي: طب ياسطا عايزة اندومي..

جاك: اعععع... اندومي اي.. هتشليني.. دا وقت اندومي!!... احنا ف اي ولا ف اي!!.. وبعدين اندومي اي اللي عايزاه!!.. انتي صغيره!!

جاكي: مش عايزه من وشك حاجه.. وقوم يلا غور من هنا.. انت نايم ع سريري ليه اصلا.. يلا بره..

جاك: بقاا كدا!

جاكي: ايون يلا..

جاك: طب انا غيرت رأيي ومفيش جواز ياجاكي.. اتجوزي سريرك بقاا.. سلام..

سابني وطلع..

جاكي: شلل ف وراكك..

جاك: سمعتك ولو جيتلك هنفخك..

جاكي: امشي يلاااا...

ـــــــــــــــــــــــــــــــــــــــــــــــــــــــــــــــ

عمو احمد: يعني كدا متفقين!

ماما: على بركة الله..

راحت فيزو مزغرطه...

جاك: خير...

فيروز: اتفقنا ع كل حاجه... المهم هي لسه زعلانه!

جاك: لا متشغليش بالك انا هظبطها... انا خارج حَبه وراجع...

فيروز: رايح فين دلوقتي!

جاك: رايح جنبنا هنا بس وجاي ع طول...

سابها ومشي وماما طلعتلي..

ماما: لسه صاحيه!

جاكي: ايوا..

ماما: اتفقنا ع كل حاجه..

جاكي: مبروك..

ماما: لسه زعلانه مني!

جاكي: وهزعل منك ليه!

ماما: طب انا اسفه... حقك عليا.. انا مكنتش عارفه انا بقول اي..

جاكي: لا تمام.. متشغليش بالك..

ماما: يعني هتفضلي زعلانه مني كدا!

جاكي: مش زعلانه ياماما...

ماما: طب مش عايزه تعرفي اتفقنا ع اي!

جاكي: مش عايزه اعرف... انا عايزاه هو بس..

ماما: ياختي عليكي.. مش للدرجادي..

جاكي: لا للدرجادي..

ماما: طب ياست الف مبروك.. انا رايحه انام...

سابتني وطلعت وبعدين لقيته بيفتح الباب...

جاكي: اي اللي جابك تاني!

جاك: تصدقي انا الغلطان.. جبتلك اندومي اهو..

جاكي بفرحه: احلف... والنبي انت عسل وانا بموت فيك.. امووواه..

جاك: عايزها ع خدي عشان تاخديهم..

جاكي: ماتتلم بقاا...

جاك: امسكي.. والله خساره فيكي الشحططه اللي انا فيها دي..

جاكي: جبت دول بس!!... اي النتانه دي!

جاك: دول عشره ياجاكي..

جاكي: قليل..

راح زقني

جاك: طب غوري ف داهيه بقااا..

جاكي: اي الغشوميه دي.. هو انا قدك!!.. صحيح.. مين تحت..

جاك: مفيش غير فيروز.. الباقيين ماتوا باين...

جاكي: حلو.. يلا ننزل نعمله بقااا..

جاك: لا ياختي مليش دعوه.. اصلا فيروز لو شافتك هتنفخك...

جاكي: ليه..

جاك: شافت البنات بيعملوه قبل كدا نفختهم بالشبشب..

جاكي: هي فيها شبشب!!

جاك: ايون.. عشان هي مبتحبش البتاع دا.. وبعدين دا مضر.. انا مش عارف جيبته لي اصلا...

جاكي: طب ماتكمل جميلك ياقمر حياتي انت وتعالى اعمله معايا..

جاك: هاهوو.. انتي عايزاني اتضرب بالشبشب!!.. انا مالي ياختي..

جاكي: لا هنشوفها فين الاول... وندخل نعمله من وراها..

جاك: ولو قفشتنا!!

جاكي: عيب عليك انا حرامي قديم... هنتسحب بالراحه ومحدش هيحس بحاجه..

جاك: مش هيجيلي من وراكي غير التعب والله..

جاكي: يلا بس... متبقاش جبان...

نزلنا نتسحب وملقيناش حد...

جاكي بصوت واطي: شكلها نامت.. يلا بسرعه..

دخلنا المطبخ ولقينا عطيات...

جاك بهمس: اششش.. متطلعيش صوت ياعطيات.. هي فيروز فين!

عطيات: انتوا بتتكلموا كدا ليه!

جاك: وطي صوتك.. هنعمل اندومي.. خليكي جدعه بقاا وامنيلنا المكان ياقمر..

عطيات: لا يعم فيروز تموتني..

جاك: اي النداله دي.. اقفي ياست هنا وهي مش هتيجي اصلا...

عطيات: ماشي بس بسرعه...

بدأنا نعمله بالراحه وفجأه لقينا حد ماسكنا احنا الاتنين من قفانا...

ـ بتعملوا اي..

جاك: طبعا لو حلفتلك اني بعقلها واقولها كدا غلط مش هتصدقيني..

فيروز: بتعملوا القرف دا ليه!

جاكي: عيب يافيزو واحده عاقله زيك تقول ع نعمة ربنا قرف.. تؤتؤ.. مكنتش اتوقع منك كدا..

فيروز: بت.. ارمي البتاع دا..

جاكي: والنبي ياشيخه.. عشان خاطري.. دا حلو والله.. وانا نفسي رايحاله..

فيروز: بتتوحمي اياك.. مش عايزه دلع ماسخ هنا..

جاك: خلاص يافيزو خليها تعمله..

فيروز: مستحيل..

جاك: طب بقولك اي.. تعالي في موضوع كدا.. اصلا بيقولك...

قعد يلاهيها وبيشاورلي عشان اخلص..

عملته بسرعه وخدت الطبق وجريت ع فوق..

جاك: سلام يابطه..

سابها وطلع يجري معايا واحنا بنضحك..

فيروز: ياعيال خدوا... مش هسيبكوا بردو..

طلعت ورانا واحنا دخلنا وقفلنا الباب بسرعه...

فيروز: افتح الباب ياجاك..

جاك: لا احنا مش هنا..

فيروز: طب انا هطلعلكوا عمكوا.. ماشي..

جاك: يلا اقعدي بسرعه...

حطيناه ف البلاكونه وقعدت اكل..

جاكي: وانت مش هتاكل!

جاك: لا ياختي مبحبوش..

جاكي: لا ياسطا اقعد بس.. اقعد والله هيعجبك انا بعمله حلو..

قعد وبدأنا ناكل..

جاكي: صحيح..

جاك: امم..

جاكي: فين محمد... مش باين من ساعة مارجعنا..

جاك: مش عارف.. تلقاه ف اوضته.. فكك منه دلو...

جاكي: اي.. سكت ليه!

جاك بتناحه: بصي..

بصيت بعيد لقيت خيال اسود واقف ف الضلمه بعيد...

جاكي: احييييييه....