القائمة الرئيسية

الصفحات

رواية مزاوله حب الفصل السابع عشر 17 بقلم دودو محمد

 رواية مزاوله حب الفصل السابع عشر 17 بقلم دودو محمد 

رواية مزاوله حب الفصل السابع عشر 17 بقلم دودو محمد 

رواية مزاوله حب الفصل السابع عشر 17 بقلم دودو محمد 

كانت تمارا منهاره وطلبت من ياسين أنه يتجوزها وهو رفض وقالت

تمارا :- بس انا فعلا تعبت نفسى ابدء حياتى واعيشها من جديد ومحتاجه حد يساعدنى على كده يا ياسين وانت الوحيد اللى هتقدر تعمل كده
ياسين :- سكت ومردش عليها
تمارا :- ها قولت ايه
ياسين :- بصى يا تمارا أهدى دلوقتى ولما تكونى كويسه نبقى نتكلم فى الموضوع ده
تمارا :- انا هاديه يا ياسين رد عليا
ياسين :- انا خايف اقولك اه اكون تجربه بالنسبه ليكى ومتقدريش تنسى يوسف وساعتها قلبى هيتوجع اوى يا تمارا وهحس بنفس الاحساس اللى انتى حاسه بيه دلوقتى ويمكن انا اكتر لأن انا راجل وصعب أقبل أن حبيبتى تبقى معايا وقلبها وتفكيرها مع راجل تانى ارجوكى افهمى موقفى يا تمارا
تمارا :- بدموع فهمت يا ياسين تصبح على خير
ياسين :- وانتى من أهله
تمارا :- قفلت السكه مع ياسين ونامت على السرير وحطت ايديها على وشها وقعدت تعيط
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها بصعوبه قامت قعدت على السرير واتنهدت بوجع وبصت نحيت الشباك وقامت من على سريرها وراحت عند الشباك وقفت فيه وبصت على اوضت يوسف وبعد كده بصت على الجنينه ملاقتش حد دخلت تانى على الحمام اخدت شاور وخرجت لبست هدومها أدت فرضها ومسكت تليفونها بصت فيه لاقت ياسين متصل بيها قفلت التليفون تانى ونزلت تحت لاقت امها وأبوها قاعدين قالت

تمارا :- صباح الخير
عماد :- صباح النور يا بنتى اقعدى افطرى
تمارا :- مليش نفس يا بابا وبصت لامها وقالت مالك يا ماما مش بتردى عليا ليه انتى زعلانه منى فى حاجه
سميه :- لاء خالص وانتى حد يزعل منك فى حاجه ده انتى ملاك عايش معانا فى البيت
تمارا :- راحت عند امها وحضنتها من ضهرها وقالت خلاص بقى يا سمسمه وحيات عماد عندك متزعليش منى انا اسفه يا ستى
سميه :- انتى بقيتى قليلة ادب ولسانك طويل يا تمارا ومش عامله ليا اى اعتبار
تمارا :- يا ماما انا مغلطش فى حد طنط سميحه معرفش ايه زعلها مع أن ابنها هو اللى دايمآ بيغلط فى حقى
سميه :- مهما كان ده راجل لكن انتى بنت مينفعش تغلطى فيه قدامنا كده وهى من حقها تزعل على ابنها
تمارا :- وانتى يا ماما مش من حقك تزعلى على بنتك برضه
عماد :- خلاص بقى قفلوا على الموضوع ده مش عايز حد يتكلم فيه تانى فاهمين
تمارا :- انا عن نفسى مش هتكلم فيه تانى
سميه :- هو ده اللى ربنا قدرك عليه بدل ما تقولها انتى غلطانه وروحى راضى سميحه
عماد :- بنتى مغلطتش فى حد يا سميه ومش هتروح تعتذر لحد وياريت تخفى انتى كمان شويه على البت
سميه :- والله العظيم ما فى حد مطلع بنتك مدلعه اوى كده ومخليها مش محترم حد غيرك انت
عماد :- طول ما انا عايش فى الدنيا دى هعيش علشان ادلعها بس وابقى سند ليها
تمارا :- ربنا يخليك ليا يا حبيبى
سميه :- خليه ينفعك
تمارا :- حضنتها وقالت وطب والله العظيم بحبك وبموت فيكى خلاص بقى يا سميه هاتى بوسه
سميه :- اوعى كده
تمارا :- خلاص بقى يا ماما وبستها من خدها وقالت عسل مكرر يا ناس
سميه :- اممم كلى بعقلى حلاوه
تمارا :- ليه هو عقلك عيش اكل بيه الحلاوه وقعدت تضحك صحيح الولا كريم فين
سميه :- فى اوضه فوق علطول حابس نفسه ومش بيخرج منها اموت واعرف ماله بس ايه جراره
تمارا :- بضحك تلاقيه بيحب جديد واخدت خياره وقطعت منها حته وقالت يلا باى انا ماشيه
سميه :- ضحكت وقالت هتشلنى بس بحبها وبموت فيها
عماد :- قرب منها وقال طيب وأبوها مش بتحبيه
سميه :- ابوها ده عمرى كله اجمل حاجه حصلتلى فى حياتى
عماد :- بص لفوق وقال طيب ما تيجى
سميه :- ياراجل اختشى احنا بالنهار
عماد :- وماله النهار ايه اللى يمنع يعنى تعالى بس وقام وقف وشدها
سميه :- يا راجل ايه حصلك بس اسكت احسن ما ابنك ينزل من اوضه
عماد :- ما ينزل احنا هندخل اوضتنا اصلك واحشتينى اوى ومسك ايديها وطلعوا على اوضتهم وقفل الباب و(سكتت شهرزاد عن الكلام الغير مباح)
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه

فى مكتب يوسف

دخل مالك لاقه يوسف حاطط على راسه على المكتب ونايم استغرب وراح قعد على الكرسى وقال بصوت عالى

مالك :- جووووووووى
يوسف :- قام مفزوع وقال ايه فيه ايه
مالك :- ضحك على منظره وقال صح النوم يا صاحبى
يوسف :- تصدق انك غتت ودعك عينه وقال منمتش طول الليل
مالك :- بغمزه ونمتش ليه ها الليله كانت حمرا
يوسف :- بغيظ تحب اقولك ايه هى اللى حمرا
مالك :- بص ليه وضحك وقال البطيخه صح
يوسف :- بص ليه بغيظ وقال هقل من كرامتك
مالك:- لاء وليه قلة القيمه خلينى بكرامتى احسن وضحك
يوسف :- قام قعد قصاد مالك على الكرسى وقال طول الليل فى الشارع مش طايق اروح البيت بعد ما عرفت خبر أن ارين حمل
مالك :- البس يا معلم ارين حامل
يوسف :- ايوه معرفش حملت ازاى وهى بتاخد الحبوب
مالك :- اكيد هى اللى عملت كده علشان حاسه بحبك لتمارا
يوسف :- وفوق ده كله اللى اسمه ياسين ده عايز يتقدم لتمارا
مالك :- بفرحه بجد ربنا يتمم ليها على خير يارب
يوسف :- وحياة امك هتستعبط
مالك :- ايه فيه ايه والله العظيم فرحت ليها بجد
يوسف :- انا مستحيل اخلى الجوازه دى تتم مش هقدر استحمل اشوفها مع حد غيرى
مالك:- يا ابنى انت حمار مبتفهمش مليون مره اقولك زى ما انت شوفت حياتك سيبها هى كمان تشوف حياتها
يوسف :- مقدرش والله العظيم مش هقدر
مالك :- انت انانى اوى يا يوسف سامح لنفسك تعمل كل حاجه وعايز تحرمها من أبسط حقوقها علشان حضرتك مش مستعد تجرب اللى هى حاسه بيه دلوقتى
يوسف :- ايوه يا مالك انا انانى بس فى حبى لتمارا مش قادر اتخيل انها تروح لحد غيرى
مالك :- لازم تتقبل الفكره لان تمارا مسيرها هتتجوز اذا كان ياسين ولا غيره
يوسف :- بص لمالك وبص الاتجاه التانى
مالك :- وقف وقال انا عارف اللى فى دماغك ولو فضلت عليه لا هطول عنب اليمن ولا بلح الشام وسابه ومشى
يوسف :- اتنهد بوجع ورجع راسه لوراه وقعد يفكر فى تمارا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى المكتب

دخلوا البنات التلاته المكتب وكل واحد فيهم قعد على مكتبه وقالوا

رحمه :- مش عارفه تيمو راحت فين
ندى :- هى مش جايه معاكى
رحمه :- ايوه بس قالت ليا اطلعى انتى على المكتب وانا شويه وجايه
يارا :- تمارا مبقتش عارفه هى بتعمل ايه عامله شبه الفرخه المدبوحه بتفرفر وخلاص
رحمه :- عرفتوا أن ياسين عايز يجى يتقدم ليها
يارا :- بفرحه بجد ياريت تمارا توافق بقى
ندى :- حتى لو تمارا وافقت مش هتكون سعيده معاه لأن اللى فى قلبها يوسف وبس
رحمه :- صح علشان هى مقالتش خبر ياسين ده غير لما عرفت أن ارين حامل
يارا :- بصدمه مرات اخوكى حامل
مالك :- دخل وقال ايوه علشان اللى اعتمدنا عليها فاشله
ندى :- مالك
مالك :- بتريقه لا خياله
ندى :- ههه خفه
مالك :- بت يا رحمه فين اللى اتفقنا عليه اهى الفاس وقعت فى الراس
رحمه :- اعمل ايه ما هى مش بتعمل اى حاجه علشان أمسكها بيها من يوم اللى عملته فى تمارا معملتش حاجه تانى أنا عينى مش بتغفل عنها ولا ثانيه
ندى :- بكده يوسف ادبس فيها رسمى حتى لو كشفنا حقيقتها مش هيفيد بحاجه لأنها دلوقتى حامل منه
يارا :- احسن خلى تمارا تفوق بقى وتبص لنفسها بدل اللى هى عايشه فيه ده
مالك :- على فكره يوسف بيحب تمارا بجد بس مشكلته دماغه شيطان هيوديه فى داهيه
رحمه :- ده من ساعة ما عرف بخبر حمل ارين وتمارا وياسين نام طول الليل بره ومرجعش البيت من امبارح
ندى :- يقطع الحب وسنينه اللى بيعمل فى أصحابه كده
مالك :- اممممم وايه كمان يا ست
ندى :- ها ا.ا انا بقول عليهم هما طبعآ
مالك :- معلش اصل انا بعذبك وبطلع عينك قلبى قاسى قوى
ندى :- بالعكس انت قلبك طيب اوى اوى يا مالك
رحمه :- هييييح جوز عصافير يا اخواتى تحبوا اجيبلكم شجره واتنين ليمون
مالك :- هههه خفه خليكى فى نفسك يا بيرا
رحمه :- نعم يا اخويا مين دى اللى بيرا ده انا عليا العرسان كده بس النفس
مالك :- يا شيخه روحى بلاش نخع الله يكرمك
يارا :- بلؤم انا اعرف واحد من العرسان اللى بتقول عليهم رحمه كويس اوى ودايب فيها دوب ومش وراه حاجه غير طول النهار يسألني عليها
رحمه :- احم م.م.مين ده
يارا:- أسأل قلبك يا جميل وهو هيقولك مين ده وغمزت ليها
مالك :- تقريبآ كده انا عرفته
ندى :- ضحكت وقالت وانا كمان
رحمه :- والله كلكم عرفتوا وانا لاء
يارا :- فكرى كده كويس
ندى :- خلاص هقولها اول حرف
رحمه :- قولى
ندى :- اول حرف ب د ر
مالك :- ربنا ما يحرمك من الهبل يا حبيبتى انتى كده قولتلها الحروف كلها
رحمه :- م.م.معرفتش برضه
مالك :- نااااعم يا اختى بتقولك ب د ر يبقى ايه
رحمه :- ب.ب بقولكم ايه خلونى ا.ا اشوف شغلى
ندى :- اشتغلى يا مجتهده اشتغلى
مالك :- بقولك ايه يا ندى تعالى عايزك
ندى :- ع.ع.عايز ايه
مالك :- بقولك تعالى عايزك هو انا هخطفك امشى واخد ندى وراحوا على المكتب بتاعه
ورحمه ويارا قعدوا يشوفوا شغلهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عند تمارا

نزلت رحمه من عربيتها وشافت ياسين واقف بعيد راحت عنده وقالت

تمارا :- ياسين واقف كده ليه
ياسين :- جيت اسلم عليكى قبل ما ارجع شغلى
تمارا :- ماشى دلوقتى
ياسين :- ايوه
تمارا :- بالسلامه
ياسين :- رنيت عليكى كتير مردتيش عليا ليه انتى زعلانه منه
تمارا :- اتنهدت وقالت لاء مش زعلانه هزعل منك ليه
ياسين :- علشان الكلام اللى حصل ما بينا
تمارا :- بص انت كان عندك حق انت مش ملزوم تتجوز واحده كانت بتحب شاب تانى
ياسين :- لاء طبعآ مش كده لو انتى كنتى بتحبيه ونستيه بعد كده مكانش هيبقى عندى مشكله لكن مشكلتي دلوقتى معاكى انك لسه بتحبى يوسف يا تمارا خايف احاول معاكى ومتقدريش تنسى الحب ده وانا اللى اتعب فى الاخر
تمارا :- عمومآ انسى اللى قولته ليك امبارح يا ياسين احنا اصحاب زى ما احنا
ياسين :- مسك ايديها وقال انا مستعد أضحى بعمرى كله علشان اشوف ضحكتك يا تمارا
تمارا :- سحبت ايديها وقالت عارفه يا ياسين انت طيب اوى وجدع
ياسين :- ابتسم ليها وقال هتوحشينى اوى يا تمارا لما انزل الاجازه الجايه هبقى اجى اطمن عليكى
تمارا :- ابتسمت ليه وقالت إن شاءالله
ياسين :- ولو تسمحى هبقى اتصل اطمن عليكى كل يوم
تمارا :- فى اى وقت هرد عليك علطول
ياسين :- خلى بالك على نفسك
تمارا :- وانت كمان باى
ياسين :- ابتسم ليها ووقف تاكسى وركبه وشاور ليها وهو ماشى
تمارا :- اخدت نفس عميق وغمضت عينيها بوجع وطلعت الشركه دخلت قعدت وقالت صباح الخير
يارا :- صباح النور
رحمه :- روحتى فين كده
تمارا :- مفيش ياسين كان هنا بيسلم عليا علشان ماشى
يارا :- انا فرحت اوى لما رحمه قالت إنه متقدم ليكى
تمارا :- اتنهدت وقالت هو مش متقدم ولا حاجه انا اللى طلبت منه يتجوزنى ورفض
يارا:- بصدمه ايه طيب ليه تعملى كده يا تمارا
تمارا :- تغير قولت بدل ما العريس يطلب العروسه اغير انا واخليها العكس
يارا :- بتتريقى
تمارا :- اصل هقولك ايه انا تعبت ونفسى اعيش حياتى زى اى بنت
رحمه:- على فكره بقى انا حسيت انك بتكذبى امبارح لما قولتى كده
تمارا :- بس هو رفض قال مينفعش يستغل الظروف ويجى يتقدملى
يارا :- جدع اوى اللى اسمه ياسين ده بجد تحسيه راجل فى نفسه كده
تمارا :- سيبك انتى فين البت ندى
رحمه :- مع مالك فى مكتبه
تمارا :- ماشى وقعدت تشوف شغلها وشويه وجه السكرتير يبلغ تمارا أن يوسف عايزها اتنهدت وقالت ليه يروح وهى هتيجى وراه وبصت لبنات وقامت راحت عند يوسف خبطت على الباب وسمعت صوته بيإذن ليها تتدخل فتحت الباب ودخلت وقالت افندم
يوسف :- اقعدى يا تمارا
تمارا :- قعدت وقالت اتفضل حضرتك اتكلم
يوسف :- قام وقف وراح عندها وقعد قصادها وقال تمارا انا اسف
تمارا :- على ايه حضرتك حصل حاجه فى الشغل
يوسف :- انا مش بتكلم على الشغل يا تمارا انا بتكلم عليا وعليكى
تمارا :- وقفت وقالت مدام مفيش حاجه تخص الشغل عن اذن حضرتك ولسه هتمشى
يوسف :- وقف قصادها وقال تمارا حرام عليكى بقى كفايه اللى بتعمليه فى نفسك وفيا انتى بتحبينى وانا بحبك يبقى ليه العذاب ده
تمارا :- لو سمحت خلينى امشى
يوسف :- لاء يا تمارا مش هسيبك تمشى غير لما تردى عليا
تمارا :- غمضت عينيها علشان تحبس الدموع فى عينيها وقالت لو سمحت سبنى امشى ده مكان شغل
يوسف :- مسكها من دراعها وقال تمارا فتحى عينك بصيلى انا يوسف حب عمرك فاكره لما كنا صغيرين كلامنا ولعبنا وضحكنا مع بعض فاكره لما قولتى ليا طول ما انت معايا مش بخاف من حد انا يوسف يا تمارا فتحى عينك
تمارا :- اخدت نفس عميق وقالت يوسف اللى انت بتتكلم عليه ده بالنسبالي انتهى سافر ولسه مرجعش أما انت بقى فأنت واحد معرفهوش واحد انانى عايز كل حاجه ليه بنى أدم ضعيف بيجرى وراه شهوته اى واحده تضحك ليك وتقرب منك تسيب ليها نفسك انت واحد غدار بتغدر بقلوب حبيتك بصدق انت عارف انا اتعلمت منك القسوه اه والله زى ما بقولك كده بقى قلبى قاسى من نحيتك اوى بقى حتة حجره مهما تقول وتعيد ما بتأثرش زى ما تقول كده غدرك بيا خلانى عندى اللا مبالاة يعنى لو شوفتك بتبكى دلوقتى بدل دموعك دم ولا هيهمنى انا بقعد مع نفسى وقول هو انا حبيت ازاى هوا فراغ حبيت شخص تانى خالص غيرك شخص رسمته فى خيالى شخص مثالى زياده عن اللزوم؛ معنى اصح حلمت براجل بجد وصحيت على كابوس صحيت لاقيتك واحد تانى خالص ولا ليك اى صله بالراجل اللى حلمت بيه ولا بالرجوله اصلا واتنهدت وابتسمت ليه وقالت لما تعرف تشوف صرصور ودنك بعنيك سعتها بس هبقى ليك عن اذنك يا جوى وسابته وخرجت
يوسف :- وقف مكانه مش عارف يرد عليها وبص عليها وهى خارجه وقعد على الكرسى بأنكسار ودموعه نزلت منه
تمارا :- خرجت من مكتبه وراحت على الحمام وقفلت الباب وراها وقعدت تعيط وتخبط راسها فى الباب وتقول أنا تعبت بجد خلاص تعبت
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى مكتب مالك

دخلوا الاتنين مع بعض وقعدت ندى على الكرسى وقالت

ندي :- نعم عايز ايه
مالك :- قعد وقال عايزك
ندى :- نعم يا اخويا
مالك :- كتك خوت لما يخوتك بلاش ام الدماغ الشمال دى انا قصدى عايز اجى اتقدملك
ندي :- ابتسمت بكسوف وقالت بجد
مالك :- لاء بهزر اطلعى بره يا ندى
ندى :- بس غلاسه بقى يا مالك
مالك :- بقولك عايز اتقدملك تقولى بجد ايوه بجد يا ندى انا فيه حاجات كتير اوى عايز اعملها معاكى بس لازم تكونى مراتى على سنة الله ورسوله
ندى :- بغباء حاجات ايه دى يا مالك
مالك :- مشى أيده على شعره وابتسم وقال لاء دى حاجات كبار وانتى لسه صغيره لما تكبرى هقولك
ندي :- فهمت قصده و ضربته على كتفه وقالت والله العظيم انت قليل الادب
مالك :- ضحك وقال طيب ما انا بقولك عايز بالحلال يا بنت الناس
ندى :- بكسوف ع.ع عندك اخويا روح كلمه
مالك :- مكنتش مستنى لما تقوليلى على الفكره العبقريه دى يا ام العروف بس فيه مشكله
ندى :- مشكلة ايه دى
مالك :- هنقول ايه لاخوكى لما يشوفنى ويعرف أن انا العريس اللى المفروض كان متقدم ليارا
ندى :- قول يا لهوى كده لاء يا لهوى ايه الطم احسن انا ازاى نسيت الموضوع ده
مالك :- علشان انتى غبيه يا حبيبتى ووقعتينا فى ام المشكله دى حليها بقى يا حلوه
ندى :- اممم مش عارفه اعمل ايه يا مالك قولى انت
مالك :- والله يعنى انتى السبب ومش عارفه تحليها
ندى :- لاء مش عارفه
مالك :- طيب ما تجيبى بوسه وانا اقولك
ندى :- بس كده من عينيا غمض عينك بس علشان بتكسف
مالك :- ايوه بقى وغمض عينه
ندى :- رفعت حاجبها بغيظ وقربت من كتفه وعضته
مالك :- فتح عينه بألم وقال اااااه يا بنت العضاضه
ندى :-ابتسمت ليه وقالت علشان تحترم نفسك يا حبيبى
مالك :- بألم المفترى عليه ربنا
ندى :- فكر بقى هنعمل ايه وأبقى قولى بعد الشغل باااااى وخرجت وسابته
مالك :- حط ايده مكان العضه وقال منك لله يا بعيده وابتسم وقال مجنونه بس بعشقها وقعد على مكتبه يشوف شغله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى وقت الشغل ونزلوا البنات الاربعه مع بعض ووقفوا على الرصيف وقالوا

رحمه :- انا تعبت اوى النهارده فى الشغل
ندى :- وانا والله انا حاسه ان احولت من كتر الشغل
يارا :- متنسوش أن المدير مش طايق حد فينا من ساعة ما اخدنا الاجازه كلنا مره واحده
تمارا :- وحياتك المدير مش طيقنا من ساعه ما اشتغلنا عنده فى الشركه اصلا
ندى :- على رأيك
يارا :- يا ب.ب بنات شوفوا مين جاى هناك
ندى :- بصدمه انس اخويا طيب ازاى دى عمرها ما حصلت
تمارا :- غريبه دى
رحمه :- ربنا يستر بس
يارا :- غمضت عينيها بتوتر وقالت أجمدى يا يارا أجمدى
ندى :- بصت ليارا وقالت أهدى يخربيتك
انس :- السلام عليكم
كلهم :- وعليكم السلام
ندى :- انس خير إن شاءالله اول مره تيجى ليا هنا
انس :- مفيش كان عندى مشوار قريب من هنا قولت اجى اخدك معايا فى السكه
يارا :- كانت مغمضه عينيها بتوتر
انس :- ازيك يا انسه يارا
يارا :- مردتش عليه
ندى :- خبطت يارا بكوعها فى جمبها
انس :- انسه يارا
يارا :- ها ن.ن.نعم
انس:- بقولك ازيك
يارا :- ت.ت تمام الحمدالله
انس :- ومامتك عامله ايه
يارا :- الحمدالله ك.ك.كويسه
رحمه وندى وتمارا :- التلاته بصوا لبعض بأستغراب
تمارا :- طيب احنا هنمشى بقى عايزه حاجه يا ندى
ندى :- لاء شكرآ
تمارا :- بصت لانس وقالت على فكره احنا كمان كنا واقفين بس شكل حضرتك مأخدش بالك غير من يارا وبس
انس :- بص ليها بغيظ وقال لاء اخد بالى منكم
تمارا :- عمومآ احنا الحمدالله كويسين شكرآ على سؤالك يلا يا بنات
انس :- احم خليكى يا انسه يارا هروحك معانا على السكه
يارا :- بفرحه واندفاع قالت ماشى واخدت بالها قالت ا.ا.اقصد مينفعش انا هروح على سكة البنات عن اذنك ومشيت مع تمارا ورحمه
ندى :- هو ايه النظام ها
انس :- زقها وقال امشى يا بت قدامى
ندى :- انا ماشيه اهو متزقش ومشوا الاتنين مع بعض
يارا :- مشيت مع البنات وقالت انا غبيه ازاى رفض امشى معاه ده انا كنت هموت عليه
رحمه :- جدعه انك رفضى
تمارا :- بس انس شكله بيحبك يا يارا
يارا :- انس بيحبنى انا ده كتلة تلج بعيد عنك ما انتى عارفه اللى فيها
رحمه :- ممكن يكون بيحبك بس هو من الناس التقيله شويتين
يارا :- مستحيل انس يكون بيحبنى مش علشان عرض عليا يروحنى معاهم يبقى كده بيحبنى طول عمرى قصاده ايه جد يعنى
تمارا :- مش عارفه
يارا :- بس انا برضه غبيه كنت مشيت معاهم على الأقل كنت شبعت منه شويه أصله كان واحشنى اوى
رحمه:- الله النهارده اليوم العالمى للاخوات
تمارا :- تقصدى ايه
رحمه :- بدر اخوه يارا جاى هناك اهو
يارا :- بأستغراب بدر
بدر :- جه يجرى وقال ............
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يتبع ...
لقراءة الفصل الثامن عشر : اضغط هنا 
لقراءة باقي فصول الروايه : اضغط هنا 
هل اعجبك الموضوع :

تعليقات