رواية ليالي الفهد الفصل الرابع والعشرون 24 بقلم سارة أحمد
 |
| رواية ليالي الفهد الفصل الرابع والعشرون 24 بقلم سارة أحمد |
رواية ليالي الفهد الفصل الرابع والعشرون 24 بقلم سارة أحمد
دلف فهد الى الغرفه واستغرب حين رأى ليالى ترتدى احدى بدلات الرقص السوداء اللامعه ولكنها كانت محتشمه واشبه بفستان اسود لامع ذو فتحه طويله من على احدى ساقيها
واتقنت وضع مساحيق التجميل ببراعه واسدلت شعرها ووضعت به مشبك لامع على شكل ورده سوداء
هتف فهد باستغراب قائلا:ليالى !!؟
شعرت بالخجل واعطته ظهرها فاقترب منها يهتف قائلا: لا بقولك ايه دا انا ما صدقت انك اتجرأتى وخطيتى خطوه زى دى
التفتت له وهتفت قائله : طيب هتغمض عينيك عشان متكسفش
فهد : اغمض عينى واشوفك ازاى هتخيل انا ولا ايه !!؟
ليالى : فهد انا مكسوفه
فهد : حد يتكسف من روحه
ليالى : مش بعرف اصلا
فهد : اللى هييجى منك هقبله وهحبه كمان مش قولتلك قبل كدا اى حاجه نفسي فيها عايزها منك انتى وباسلوبك انتى
ليالى : طيب انت هتقعد هنا
فهد: مكان ما انتى عيزانى اقعد هقعد المهم اشوفك
جلس فهد على الاريكه المقابله للفراش وقام بتشغيل اغنيه لعبد الباسط حموده (يعجبنى كلك يا وله كلك عاجبنى )
بدات ليالى تتمايل ونظرات فهد تخجلها تاره وتشجعها تاره
تفاجئ فهد من اتقانها فى الرقص فهو ظن انها لا تجيد الرقص
بعد ان انتهت الاغنيه حملها فهد وجلس بها على الفراش يقبلها ثم هتف قائلا: ايه الجمال دا ؟ هو دا اللى مش بتعرفى ترقصي !!؟
امال لو بتعرفى بقا كنت عملتى ايه !!!؟
ليالى : لا بجد عجبتك ؟
فهد : عجبتينى موووت على فكره مكنتش متخيل ابدا انك بتعرفى ترقصي حلو كدا
ضحكت ليالى تلك الضحكه الانثويه ليهتف فهد قائلا: ايوه بقا دا احنا انحرفنا على الاخر
ليالى بخجل:فهد
فهد : قلبه
وانهال عليها بالقبلات حتى اخذها فى عالمه .
فى غرفة اسماء وعدى
عدى : موكا ياموكا
اسماء:قلب موكا
عدى : ياخلاثي على الجمال ياناس الزوجه القمر المطيعه يا ناس
اسماء:انجز يا عدى عايز ايه ؟
استغرب عدى وكشر بين حاجبيه قائلا :انجز ياعدى عايز ايه !!!!؟ما احنا كنا ماشيين حلو بتقلبي ليه ؟
اسماء:اصل انا عارفه انت عايز ايه
عدى : يا سلام طيب وفرضا انا عايز اللى فى دماغك ايه المشكله
اسماء: ولا اى مشكله بس ممكن تقولى ايمان صاحبتى كانت واقفه معاك النهارده كل دا بتعمل ايه !؟
عدى : على فكره بقا دا اللى انا كنت هكلمك فيه اصلا مش اللى جه فى دماغك دا خالص بس طبعا بقا عقابا ليكى ولسوء نيتك انا بقا هنفز اللى جه فى دماغك
اسماء: طيب وهى ايمان كانت عايزه ايه !!؟
عدى : كانت عايزه رقمى عشان لو محتاجه حاجه وقالتلى انها بتتعرف عليا عشان شخصيتى عجباها
اسماء:وانت بقا اديتها رقمك !!؟
عدى : مش عيب تسألى سؤال زى دا طبعا اديتها رقمى
اسماء بعصبيه : نعم يا اخويا
عدى : اخوكى !!!؟بعد كل اللى حصل دا
اسماء:عدى على فكره مبهزرش
اقترب منها عدى وهتف قائلا : ولا انا بهزر
اسماء:يعنى ايه !!؟
عدى : يعنى انتى مش واثقه فيا يا اسماء وانا قولتلك قبل كدا ان مفيش اى واحده غيرك تملى عنيا وقولتلك ان اهم حاجه هتكون بينا وهتقوى علاقتنا وحبنا هى الثقه والاهتمام
وانتى ولا بتثقى فيا ولا بتهتمى بيا ودايما بتتهربي منى
اسماء: عدى انا مقصدش انا ......
عدى مقاطع لحديثها : اسماء انا هخرج اقعد بره شويه
اسماء:عدى
عدى :معلش مخنوق شويه ومحتاج اقعد مع نفسي
خرج عدى من الغرفه وترك اسماء حزينه وفى حيره من امرها لماذا تتصرف إيمان بتلك الطريقه وتحاول التقرب من زوجها
وايضا ظلت تفكر هل يشعر عدى انها تنفر من علاقتهما سويا فنفت ذلك برأسها وهتفت لنفسها قائله : لا ياعدى انت فاهم غلط كل الموضوع اه انا ببقى خايفه بس مش اكتر
بس انا اللى غلطانه انا لازم اخليه يحس باهتمامى بيه لازم اقربه منى بدل ما تلف عليه العقربه ايمان دى هى او غيرها ويخطفوه منى انا مستحيل اقدر اعيش من غير عدى لحظه انا بحبه اووى وكمان واثقه فى حبه ليا بس هو مهما كان راجل وسهل على اى واحده توقعه فى شباكها خصوصا لو انا اهملته وانا من اول يوم جواز وانا من خوفى دايما محسساه انى بنفر منه
بعد مرور ساعه دلف عدى الى الغرفه ليجدها هادئه مغلقة للانوار فاقترب من الفراش يتلمسه فوجدها نائمه فاقترب منها يقبلها وانامله فى خصلاتها ولكنه تفاجئ بإضاءة للانوار الهادئه بالغرفه وهى تتعلق بذراعيها فى عنقه فابتسم عدى قائلا : اه ياعفريته انتى صاحيه وبتشتغلينى
همت اسماء وذهبت ناحية احدى السماعات بالغرفه وقامت بتشغيلها على صوت هادئ باغنيه رومانسيه لعمرو دياب (وماله لو ليله تهنا بعيد وسيبنا كل الناس
انا ياحبيبي حاسس بحب جديد مالينى دا الاحساس وانا هنا جانبي اغلى الناس انا جانبى احلى الناس )
توسعت عينيه عليها واطلق صفيرا وهتف بغمز قائلا: شكلها ليله لوز اللوز ايه الجمال دا
كانت اسماء ترتدى منامه حرير سوداء قصيره تبرز قوامها .
ابتسمت اسماء على كلماته ومدت يدها له ليقف ويرقص معها على تلك الاغنيه التى اختارتها لتعبر له عن مدى حبها له ولتلك اللحظات بينهم
ليمر عليهم الوقت وهما مازالا بين احضان بعضهما لبعض
فهتفت اسماء قائله : عدى انا اسفه على اسلوب كلامى معاك انا مكنش ينفع اتكلم معاك بالاسلوب دا بس انا كنت غيرانه عليك خصوصا انى مش مرتاحه لتصرفات ايمان من وقت ماجت
عدى : حبيبتى انا مش زعلان منك وبعدين انا كمان مش مرتاح لها
اسماء بتذمر طفولى : اممم مش مرتاح لها امال رايح تديها رقمك ليه بقا ان شاء الله
عدى: انتى مجنونه رقم ايه اللى اديهولها دا انا مرضيتش احرجها بس وقولتها تقدرى تاخدى الرقم من اسماء او لو احتاجتى حاجه تكلمى اسماء وهى تعرفنى وقولت اكيد لو طلبته من اسماء اسماء هتاخد بالها من تصرفاتها
اسماء:هى فعلا تصرفاتها غريبه اوى
عدى : فكك منها بقا ربنا يسهلها بعيد عننا احنا هنضيع الليله الحلوه دى عليها ولا ايه
دى مش من السهل تتكرر تانى
اسماء: لا ان شاء الله هتتكرر تانى ولازم تتاكد بقى ان انا بحبك وبحب كل لحظه بعيشها معاك انا بس كل الحكايه انى بخاف
عدى : عارف ياقلبي متزعليش منى انا ببقا مشتاق لك وكمان انا قولت كدا من خنقتى مقصدش انا عارف انك بتحبينى بس انا كمان بحاول اكون حنين معاكي جدا
اسماء : وساعات بتتجنن
عدى :طيب قوليلى بس اعمل ايه وانا معايا الجمال دا كله البنت اللى بحبها وبتمناها كل لحظه حتى وانتى معايا بكون مشتاقلك يا موكا .
اسماء: حبيبي ياعدى انا بحبك اوى
عدى :انا بعشقك يا موكتى
ظلوا يتبادلون احاديث العشاق حتى حملها عدى وسار بها ناحية الفراش واخذها فى احضانه ونام فاستغربت اسماء وهتفت قائله : ايه دا انت هتنام !!!؟
عدى : اه هنام ياقلبي عشان ورانا سفر الصبح
اسماء بحيره : عدى انت لسه زعلان ؟
عدى : لا انا مقدرش ازعل منك ابدا ياروحى انتى ليه بتقولى كدا !!؟
اسماء: اصل انت ........
عدى :يعنى عشان محصلش حاجه لا مش زعلان بس مش عايز حاجه تحصل تخوفك وتضيع الاحساس الجميل اللى عشناه من شويه وننام مبسوطين عشان نصحى مبسوطين وحبنا اكبر لبعض
ومش عايزك تتعودى على ان كل سهره حلوه او كلمتين حلوين هتكون اخرتهم حاجه مابينا وننام لا انا عايز دا يكون العادى بتاعنا وروتينا اننا نتكلم ونرقص ونسهر ونحب بعض بدون اى شروط او نهايه مكرره لكل مره ونسيب الموضوع دا لمشاعرنا هتوصلنا لحد فين ولازم تكون وصلت بينا احنا الاتنين مش المفروض انا ابقى مبسوط واوصل للى انا عايزه وانتى لاء او انتى تبقى مجبره فهمانى ياروحى ؟
ابتسمت اسماء واحتضنته بشده وهى تقبل وجهه لتفهمه ماتمر به ومراعاته لمشاعرها
ابتسم عدى فهو يحاول ان يصل بها الى اعلى مراحل الحب والعشق يريدها ان تعشق تلك اللحظات بينهم لاترهبها وتنفرها ليزداد حبهما اكثر واكثر .
فى صباح يوم جديد
تحمل السيارات من بعض خيرات ارض تلك القريه فيهتف محمود المنياوى قائلا: ليه بس كل التعب دا ياحج سالم
سالم : تعب ايه بس دى شوية حاجات بسيطه من خير البلد زرع ارضنا له طعم تانى عن الحاجات المعلبه اللى عندكم دى
محمود : اكيد طبعا
سلمت اسماء على الجميع وركبت السياره بجوار عدى وفى سياره اخرى كان يقودها ادم الذي لم يرفع عينه من على ملك مودعا لها وبجانبه محمود الذي كان يراقب خديجه من احدى المرايات فهى كانت تجلس فى المقعد الخلفى للسياره
وبعد مرور ساعات وصلت السيارات الى فيلا المنياوى
هتف محمود قائلا: حمدالله على السلامه
ادم : الله يسلمك ياعمى
خديجه :الله يسلمك ياحج محمود
وصلت سيارة عدى واسماء فهتف قائلا:حمدالله على السلامه ياموكا
هتفت اسماء قائله:الله يسلمك ياحبيبي
نزل عدى وفتح لها باب السياره فقابلها محمود وخديجه وادم مرحبين فهتف محمود قائلا:حمد الله على السلامه ياعروستنا نورتى البيت
اسماء:منور باهله ياعمى
خديجه: وان شاء الله ينور اكتر بيكى ياحبيبتى وتمليه عيال يجروا فيه ويخلوا الصوت يوصل لكل الفلل اللى حوالينا
ضحك الجميع وهتفت اسماء قائله : تسلميلى ياطنط خديجه
غمز محمود لولده عدى فاقترب عدى من اسماء وحملها فشهقت قائله:عدى انت بتعمل ايه !!!؟
عدى : دى عاده عندنا من زمان لازم العريس يشيل عروسته لما تيجى تدخل البيت لاول مره بعد الجواز
ضحكت اسماء وهتفت قائله : بجد طيب كويس كل يوم من دا بقا
عدى : لا يا اما هى شغلانه ضهرى ينقطم هى مره واحده بعد الجواز وخلاص هى دى العادات
اسماء: لا ما انا هغير العادات دى وتبقى على طول عشان بعد كدا ادم لما يتجوز ملك يفضل يشيلها هى كمان
عدى : لا ياعم دول داخلين وناويينها بقا
ادم : هى بس ملك تيجى وانا موافق على كل الشروط
عدى : ماشي يانحنوح وانتى يا حلوه يا اللى هتجبيلى الغضروف قريب تعالى لما اوريكى اوضتك
اسماء: هتشيلنى !!!؟
عدى :لا طبعا
اسماء: خلاص طنط هتوريهالى
عدى :وهى يعنى طنط هتشيلك
اسماء:ملكش فيه هتشيل ولا مش هتشيل
عدى : بقا كدا طيب امرنا لله
هاااا استعنا عالشقى بالله
حملها عدى على كتفه بطريقه جعلت الجميع يضحكون على ذلك الثنائي وجنونهم .
صعد بها عدى الدرج وانزلها امام الغرفه ففتحت بابها وهمت لتدخل فهتف عدى بصوت جعله انثوى قائلا: برجلك اليمين ياشابه
اسماء:ايه دا ريا وسكينه !!!؟
ابتسم عدى وهتف قائلا: سمى الله ياحبيبتى وادخلى برجلك اليمين
هتفت اسماء: بسم الله الرحمن الرحيم ودلفت بقدمها اليمنى وتفاجئت من جمال الغرفه ولكنها لم تستغربها فالمكان كله عباره عن لوحه فنيه جميله
عدى : عجبتك
اسماء: الله ياعدى بجد جميله جدا
عدى: انا غيرتلك كل حاجه وحاولت اجيب كل حاجه تبقى شبهك وقريبه من ذوقك
اسماء:ايه دا هو انا ذوقى حلو اوى كدا بجد كل حاجه هنا تحفه
عدى : كل حاجه تحت امرك يا موكا احنا بس طالبين الرضا
ضحكت اسماء وهتفت : ايه دا ؟
فقلد عدى صوت محمد سعد مره اخرى قائلا: طالبين الرضا
ضحكت اسماء بصوت عالى كله انوثه فهتف هو قائلا : هتجننينى معاكى يا بنت العدنان
فى اسفل الفيلا: جلس محمود مع خديجه يتحدث معها بعد ان استأذن ادم وخرج ليجرى اتصالا مع ملك
محمود المنياوى: ها يا ام ادم مش ناويه تقوليلى رايك ؟
خديجه بخجل : رايي فى ايه ؟
محمود : فى الطلب اللى طلبته منك
خديجه : والله يا ابو عدى انا مكنتش حاطه فى حساباتى ابدا انى ممكن افكر فى الجواز مره تانيه واتفرغت حياتى كلها لادم ووقفت جانبه لحد يبنى مستقبله واخاف ابعد عنه يتشتت او يحس انى اتخليت عنه
تفاجئت بصوت ادم الذي دلف منذ لحظات يهتف قائلا: لو بتفكرى كدا يا امى يبقى متعرفيش انا واثق فى حبك ليا قد ايه ومقدر تضحيتك علشانى وانتى خلاص حطتينى على اول طريقى حتى ساندتينى لحد ما قدرت اشد عودى جدا واصلب فى مجال شغل وفى خطوبتى وارتباطى ويبقى حرام عليا اوى لو نسيت فضلك عليا ومدتكيش حقك انك تعيشي لنفسك انا موافق ياعمى وفاضل قرار والدتى اللى بتمنى انه يكون الموافقه
خديجه : يا ادم انا ....
قاطعها ادم قائلا: انا مش هفرح وانا شايف انك عماله تضحى عشانى وناسيه نفسك
خديجه: بالعكس انا كل فرحتى يا ادم بيك انت وبراحتك وفرحتك
ادم : خلاص يبقى لو بتحبينى وافقى واسعدى نفسك وافرحى
اخفضت راسها بخجل قائله : اللى تشوفوه يا ادم
ادم : يعنى اعتبر ان دى موافقه ؟
خديجه بخجل : ياعدى انا
ادم بضحك : بنت يا خوخه اسمعى الكلام ومتعصيش الاوامر
خديجه بضحك على تصرفات ابنها : اللى تشوفه يا بابا ادم
ضحك ادم وعمه محمود وخديجه لينزل عدى الدرج ومعه اسماء يهتف قائلا: بتضحكوا على ايه مش تضحكونا معاكم
هتف ادم قائلا: اصل ماما وافقت على الزواج من عمى محمود ان شاء الله
عدى بفرحه : ايه دا بجد ؟
لا دا احنا نبل الشربات بقا زغرطى يا بت يا اسماء
ضحكت اسماء وهتفت قائله : يعنى انا فاهمه صح عمى محمود هيتجوز طنط خديجه والله حاجه حلوه جدا ومبسوطه عشانكم ربنا يسعدك ياعمى
محمود :بابا بابا محمود
اسماء: اسفه ههههههه ربنا يسعدك يابابا ربنا يسعدك يااا
خديجه :هااااا
اسماء:ربنا يسعدك ياماما
خديجه : ايوه كدا تسلميلى يا حبيبة ماما
محمود :تسلمى ياموكا
خديجه: انا طول عمرى كان نفسى فى بنوته تبقى صاحبتى وقريبه منى وربنا كرمنى باحلى بنوتين
محمود :ربنا يبارك فى بيتنا ويملاه بالفرح يارب .
جميعهم : امين يارب
فى سرايا العدنان
والجميع جالسون فى ساحة المنزل ما عدا فهد وليالى
تفاجئ الجميع حين دلف عصام وفى يده ميس
عصام : السلام عليكوا
سالم : وعليكم السلام ورحمة الله اهلا ياعصام
عصام : اهلا بيك ياعمى
وقف الجميع ينظرون له باستغراب ولتلك الحقائب التى وضعها ارضا
وجلس عصام باريحيه هاتفا: نورتى بيتك يا عروسه واقفه كده ليه دا بيتك يعنى مش محتاج انى اقولك اتفضلى
ملك :بيت مين ياجدع انت ومين اللى انت جايبها تقعدها فى بيتنا دى
عصام : اخرسي يابت بدل ما اقوم اخرسك
ملك : اخرس مين يا متخلف انت انت ناسي انت عملت فينا ايه زمان !!!؟
هم عصام ليمد يده على ملك ولكن يد ابيها كانت اسرع فامسك بذراعه وهتف قائلا: اوعى تفكر تمد ايدك على حد فى البيت دا ولا على واحده من بناتى ولاحتى تبصلهم بطرف عينك عشان هصفيهالك
وانتى ياملك عيب كدا متدخليش فى الكلام
ملك : حاضر يابابا انا اسفه
سالم :هااا انت عايز ايه بقى يا عصام ؟
عصام :انا جاى اقعد فى بيت جدى وابويا انا ومراتى
سالم بغضب:انت ايه اللى انت بتقوله دا انت اتجننت انتوا اخدتوا حقكم من زمان
عصام :اثبت
سالم وازداد غضبه ووصل الى ذروته : يعنى عشان ابوك سرق الورق جاى بتتحدانى طيب يا عصام على جثتى لو دخلت
نزل فهد الدرج يهتف قائلا:اهدى ياعمى
احنا مش عايزين مشاكل
سالم : انت بتقول ايه يافهد انت فاهم هو عايز ايه ؟
فهد:عارف ياعمى بس هما خدوا الورق ومفيش فى ايدينا حاجه نعملها
سالم : فهد !!!
غمز فهد لعمه وهتف قائلا:خلاص بقا ياعمى
فهم سالم ان هناك خطب ما او فهد يخطط لشئ ما فزفر بضيق وجلس بعيدا يستمع للحديث الدائر بينهم
عصام : جدع يافهد احبك انا بقا وانت بتطبق القانون وعارف الصح من الغلط
فهد:متقلقش ياعصام انا هطبق القانون وزى مابيقولوا القانون لازم ياخد مجراه بس ياريت انت بقا متبقاش تزعل من القانون
عصام بقلق:وانا ايه اللى يزعلنى انا الحمدلله ماشي بالقانون
كانت نظرات ميس كلها حب واشتياق لفهد الذي قابل نظراتها بنظرة سخرية
فهد:لو سمحتى يا امى خلى حد من الشغالين يوضب الاوضه دى لعصام ابن عمى ومراته
عصام : لا معلش يافهد انا هاخد اوضه من اللى فوق
فهد: كان بودى والله بس مينفعش مفيش غير اوض بنات عمك واوضتى انا ومراتى واظن حضرتك مينفعش يبقى ليك دخول وخروج او انا يبقى ليا دخول وخروج جنب اوضة مراتك
عصام :اه عندك حق عموما مش مشكله بس لازم توفر اوضه لمراتى لحد معاد الفرح
فهد :فى تحت بدل الاوضه تلاته وفاضيين تقدر مراتك تقعد فى اى واحده منهم
ثم نظر لزوجة عمه وهتف قائلا: لو سمحتى يا امى خلى حد يروق الاوض دى
تنهدت زينب بياس وهتفت قائله :يا ملك ياجهاد تعالوا عشان .....
فهد مقاطع : لو سمحتى يا امى تبعتى لحد من الشغالين ييجى يساعد مرات عصام تروق اوضهم
نزلت ليالى تهتف باسمه :فهد فهد
رفعت ميس عينيها لذلك الصوت وايضا عصام فهتف فهد قائلا:تعالى ياحبيبتى انا تحت
نزلت الدرج وتفاجئت بوجود عصام وميس وظلت تنظر للجميع حتى هتف فهد قائلا: عصام ابن عمى هيعيش معانا فى البيت هو ومراته .
عصام : اه ياريت يافهد البيت يتحضر لفرحى انا وميس بنفس الطريقه اللى كان متحضر بيها لفرحك ولفرح اسماء عشان هعمل الفرح فى الجنينه وحنة العروسه هتبقى هنا وعايز .....
فهد :السرايا قدامك اعمل اللى انت عايزه وحضر للى انت عايزه ياعصام .
تعالى يا ليالى نخرج نتمشي شويه وهاتى زوزه معاكى
ليالى :حاضر
ثم هتفت قائله : طيب ايه رايك ناخد الحاجه وماما والبنات وعمى كمان ونروح الارض
نشم هوا
فهد : يبقى احسن برده
بعد مرور وقت قليل استعد الجميع وذهبوا الى الارض وقد احضرت لهم ليالى بعض المشروبات والمقبلات
افترشوا الارض وجلسوا يتسامرون ويتبادلون الاحاديث وكان سالم مازال يشعر بالغضب مما حدث
فهد : مضايق ليه بس ياعمى !!؟
سالم :يعنى مش عارف يافهد عجبك وجود عصام فى البيت وبيتكلم كانهم لهم فيه ولا البت اللى اتجوزها يعنى دونا عن كل بنات البلد وبنات مصر ملقاش غير دى
زينب:صحيح ياليالى خدى بالك منها البت دى مش سهله ومحدش عارف نيتها فى دخول البيت ايه ؟
ليالى :متقلقيش ياماما انا متوكله على الله وعارفه انها داخله البيت وعينها عليا انا وفهد بس هتعمل ايه يعنى هى ضعيفه انما انا اقوى منها بثقتى بربنا وفى فهد وحبي ليه وحبه وثقته فيا
زينب:ربنا يهديكى كمان وكمان يا ليالى
الحاجه عون : الشر وحش ياليالى والخبث وحش ودى شيطانه وخبيثه قلبها اسود من شرها اسألينى انا يا ما سمعتها بتتودود مع اختها وتحرضها علينا .
فهد :انا مش عايزكم تشغلوا بالكم بيها ولا تشاركوها فى اى حاجه وخدوا بالكم من الاكل كويس ولو سمحتى يا امى خلى اكلنا كله فى المطبخ الكبير وافتحيلها المطبخ الصغير على قدهم ودايما تخلى باب مطبخنا مقفول
جهاد :دا ايه الرعب دا يافهد اللى هنعيش فيه
فهد :ولا رعب ولا حاجه بس من خاف سلم
زينب: عندك حق يابنى
اخذ فهد عمه بجانب وظل يتحدث معه حتى يروق باله ويهدأ
فهد : اسمعنى كويس ياعمى عصام وراه مصيبه كبيره والمعلومات اللى وصلتنى انه له فى الشمال
ودخول عصام السرايا مش لهدف الورث عصام داخل بمصيبه وعارف كويس ان السرايا بعيده عن اى شبهة وكمان انه يصر ان الفرح يكون فى السرايا ومعملهوش فى اى قاعه او فى بيتهم وانشغاله بانه يكون كبير عشان يوضح لكل الناس اننا معاه واحنا اللى عايزينه معانا عشان الشك
سالم :طيب وسكته دى ايه ؟
فهد :هيكون ايه ياعمى الزفت اللى بيطفحه
سالم :بس احنا كدا جيبناه لنفسنا يا ابنى
انا خايف على بناتى ومراتك وبنتك
فهد :متقلقش انا مش هسيبهم بس لازم كل تحركات عصام تبقى قدامى واقدر اراقبه
عصام ياعمى خاطف واحده واحنا لحد الان منعرفش عنها حاجه
سالم :انت بتقول ايه !!؟مين دى ومنين ؟
البنت دى من القاهره بت غلبانه كانت شغاله فى العماره وهو ضحك عليها البت دى كانت عارفه عنه كل حاجه غواها وضحك عليها جت قدمت محضر فيه فى القاهره ومن وقتها البنت دى مش لاقينها ولما البوليس فتش اوضتها اللى ساكنه فيها فى العماره لاقوا كل حاجه تخصها فى الاوضه لكن البنت مظهرتش حتى شهادة سكان العماره ان البنت دى كانت دايما مع عصام وان البنت دى كانت عامله جمعيه مع سكان العماره والمفروض انها كانت هتقبضها بس حتى مراحتش تقبضها
معنى كدا ان فيه حاجه اجبرتها مترجعش والرأى اللى بنرجحه 90% انها اتخطفت ومن معلوماتنا عنها برده ان مفيش حد له مصلحه بخطفها غير عصام
سالم :معقول كل دا يطلع من عصام !!؟
فهد :معقول اوى ياعمى انت ناسي ان عصام خطف ملك وهى صغيره عشان يساومنا على الفلوس
سالم :انا كدا خايف اكتر على البنات
فهد :متقلقش البيت كله كاميرات حتى مداخله ومخارجه
سالم :وامتى اتزرعت الكاميرات دى
فهد : من يوم فرح اسماء لما كانوا بيعلقوا النور كان فى وسطهم ناس تبعى زرعوا الكاميرات
سالم :دا الموضوع دا شغال بقالوا فتره بقا
فهد :ايوه ياعمى والظابط المسئول عن المركز هنا صاحبي وانا بساعده ان يمسك عصام
غرف عصام كلها كاميرات واكيد هنقدر نوصل لاى حاجه من مكالمة تيلفون او ممكن تكون ميس عارفه حاجه ونوصل من كلامه معاها
احنا بقالنا كتير مستنيين دا يحصل والدنيا تضيق بيه ويطلب انه ييجى يتحامى فينا بس طبعا كل دا من ورا ضهرنا
سالم :ياااه يافهد كل دا وانا معرفش
فهد : والمطلوب انك مكنتش تعرف ياعمى عشان تتعامل عادى بس انا قولتلك عشان تطمن بس
يتبع..
لقراءة الفصل التالي : اضغط هنا
لقراءة الرواية كاملة اضغط علي : (رواية ليالي الفهد)
تعليقات
إرسال تعليق