القائمة الرئيسية

الصفحات

رواية أحببتها صعيدية الفصل السادس والعشرون 26 نور الدين جلال

 رواية أحببتها صعيدية الفصل السادس والعشرون 26 نور الدين جلال

رواية أحببتها صعيدية الفصل السادس والعشرون 26 نور الدين جلال

رواية أحببتها صعيدية الفصل السادس والعشرون 26 نور الدين جلال

عصام روح البيت وطلب يتعشي
زينب :: مش هتستني حسين لما يچي
عصام :: لا انا ميت من الجوع وتعبان هاكل وادخل انام . ولما يچي يبجي يتعشي هو
زينب :: تعبان من ايه كفانا الشر
عصام ::/طول النهار واجف علي رجلي
زينب :: طيب اتعشي وخش استحمي وانت هتفوج
عصام :: ماشي ... اتعشي فعلا ودخل الحمام استحمي ودخل اوضتة علشان ينام
وزينب دخلت وراه
عصام :: اعملي حسابك انا نازل مصر بعد بكره واحتمال اجعد هناك يومين
زينب :: ليه في حاچة ولا ايه
عصام :: لا ابدا مفيش بس رايح اشتري الفيلا اللي كت جايلك عليها من فترة لو تفتكري
زينب :: ايوة فاكرة . انا مش جادرة اصدق احنا هيبجي عندنا فيلا ف مصر زي الهوانم والبشوات
عصام :: بس اهم حاچة محدش في الدار يشم خبر
زينب :: ليه بجا هو احنا بنسرج ولا بنسرج
عصام :: ياووليه دلوك بالذات مينفعش الشيطان شاطر وممكن يوجع الدنيا في بعضها وكلة هيجول چاب فلوس الفيلا منين ومش هنخلص
زينب :: عندك حج في دي

البيت كلة نام الا اسماء فضلت قاعدة مستنية جوزها يرجع من برا وقلبها واكلها عليه . ومش عارفة تروح فين وتيجي منين
لغاية الساعة اتنين بعد نص الليل
اسماء :: كنت فين ياحسين دانا جلبي واكلني عليك من الصبح
حسين :: كت سهران في المحل
اسماء :: طيب مش تتصل حتي علي عصام وهو يجولي انك سهران في المحل .. حرام عليك دانا مغمضليش چفن وچعانة ومرضتش اكل غير لما تيچي ناكل سوا
حسين :: لا انا مش چعان .. كلي انتي انا داخل انام
.................
بالليل بعد ما عصام روح البيت واتعشي ودخل علشان ينام

عصام :: حضريلي كام هدمة كدة في الشنطة الصغيرة علشان بكره نازل القاهرة وممكن الجعدة تاخد يومين تلاتة
زينب :: ياما كان نفسي اسافر معاك مصر يا عصام واتفرچ علي الفيلا الجديدة
عصام :: ادعي بس ان اشتريها
زينب :: ليه انت ممكن متشتريهاش
عصام :: لا هشتريها طبعا بس متجاطعيش
زينب :: خلاص هجوم انا احضرلك هدومك والكام غيار اللي هتخدهم.. الا صحيح انت هتنزل في الدار بتاع مصر
عصام :: لا الدار بتاع مصر مش مفروش
انا هشوفلي شجة مفروشة اليومين دول
زينب :: بجولك ايه يا عصام كت عايزة اطلب مينيك طلب كدي
عصام :: طلب ايه ؟
زينب :: كت عايزة تلفون زي بتاع اختك الهام اللي چابهولها چوزها چلال معرفش بيجولوا عليه تشطت ولا ايه
من اللي بيدخل علي النت
عصام :: نعم ياختي تلفون ايه .؟ تشطت ؟
وعايزة تدخلي علي النت كمان ؟ داحنا اتمدنا اوي اوي يازينب
زينب :: ديهدي ومالوا يا راچل لما ابجا زي اختك الهام. واختك نعمة واشواج هو اني مش زيهم
عصام :: حاضر يازينب هچبلك التلفون حاضر وهچبلي واحد وهچيب ل اسماء وحسين كمان
زينب :: هتصرف كل الفلوس دي. ده غالي جوي
عصام :: ومالوا يابت هي الفلوس اتعملت ليه مش علشان تتصرف ..
زينب :: انا كدة حطتلك هدومك وغياراتك
عصام ؛: طيب اطفي النور بجا علشان عايز انام

........
** تاني يوم الصبح عصام سافر القاهرة وقابل السمسار بتاع الفيلا وطلب منة الأول يشوفلة شقة مفروشة.
وفعلا السمسار جابلة شقة وعصام راح الشقة حط هدومة فيها وريح شوية. علي ما السمسار كلمة علشان يروحوا يقابلوا صاحب الفيلا
عصام قابل السمسار وراح قابل صاحب الفيلا وقعدو معاه اكتر من ساعتين علي ما اتفقوا علي السعر **

عصام :: بكره نتجابل ومعايا محامي معاه عجود البيع
الراجل صاحب البيت قالوا معنديش مشكلة
وفعلا عصام والراجل صاحب الفيلا. خلاص اتفقوا علي كل شئ ومش فاضل غير الامضا علي العقود والراجل ياخد جزء من الفلوس
وبعد التسجيل ياخد الباقي له
وتاني يوم البيع تم بوجود المحامي والراجل قبض الفلوس بتاعتة وطلعوا في نفس اليوم علي الشهر العقاري وكل حاجة خلصت زي ما عصام كان عايز
واتفق مع السمسار يدور له علي فيلا تاني تكون قريبة من فيلته
والسمسار وعده ان هيشوفله فيلا قريبة منة
.................

العمدة راح البيت الكبير وهو شايل خبر مش حلو
راح وخبط علي البيت. وزينب فتحتلة
العمدة :: مساء الخير يا زينب .. كيفك يا اشوااج
اشواق :: بخير يا عمدة وازي الحاچة صباح
العمدة :: بخير وبتسلم عليكم
زينب :: مساء النور ياعمدة .. اتفضل
العمدة :: يزيد فضلك يابتي انا عديت علي المحل بتاع عصام ملجتهوش والولاا عوضين جالي ان عصام سافر مصر
زينب :: ايوة ياعمدة خير في حاچة ولا ايه
العمدة :: مش عارف اجولك ايه. بس عصام مطلوب في المركز للتحجيج معاه في جضية جتل الحاچ كرم
زينب :: يامصيبتي ؟ يحججوا مع عصام چوزي؟
اشواق ،:: يحججوا مع عصام ليه ياعمدة ؟
العمدة : : چاتلي اشارة من المركز ولازم عصام بكره الصبح يكون جدام البيه رئيس المباحث وانا عمال اتصل بيه تلفونة مجفول
ااشواق :: وهما عايزين يحججوا مع اخويا ليه
مال عصام ومال كرم
العمدة :: اللي عرفتة عن طريج ناس حبايبي في المركز ان فيه ناس من البلد جالت في التحجيج علي تهديد عصام للحاچ كرم زمان بالجتل
زينب :: يامصيبتي .. عصام ؟ ميتا الحديت ده
العمدة :: الحديت ده عدي عليه وقت كبير يمكن اكتر من سنة. بس الحكومة بتدور علي اي حاچة علشان توصل للجاتل
المهم حاولي توصلي لعصام بأي طريجة عشان الصبح لازم يكون جدام البيه رئيس المباحث.. يلا فتكم بعافية
العمدة مشي وقعدت زينب حاطة ايدها علي راسها ومش عارفة تعمل ايه
في نزول نعمة من فوق هي والحاجة امينة شافوا زينب وهي بتبكي وحاطة ايدها علي راسها
نعمة :: في ايه يا زينب مالك؟
الحاجة امينة :: ايه مالك يازينب ؟
زينب :: مصيبة مصيبة وحطتت علي راسي
الحاجة امينة :: مصيبة ايه .. اتحدتي وجعتي جلبي
زينب :: العمدة كان لسة هني وجالي ان عصام مطلوب في المركز عشان يحججو معاه عشان جتل كرم
نعمة :: ويحججوا مع عصام ليه ؟ هو كان فيه بينهم اصلا تعامل
الحاچة امينة :: ايوة صوح اشمعني عصام اللي عايزين يحججوا معاه ؟
اشواق :: عشان عصام زمان اتخانقج مع كرم وهدده جدام الناس كلها بالجتل بس دية ده من اكتر من سنة
نعمة :: ياليلة سودة ده كدي ممكن يكون عصام متهم بجتل كرم.. طب اتصلتي بعصام
زينب :: لسة . هتصل اجوله ايه ؟
اشواق :: جوليلو الحجيجة هي ده موضوع ينفع يستخبي جومي اتصلي بيه
زينب :: طيب والنبي يا اشواق هاتي تلفونك وكلميه انتي انا مش هجدر اجوله حاچة زي كدي
رشا :: حاضر. هطلع اجيب تلفوني من فوج.
الحاجة امينة :: خير يا زينب متخفيش عصام البلد كلها تعرفة وتعرف ان عمره ما يعمل كدي واصل وانتيا يا،اشوااج من،ميتا معاكي تلفون واني معرفش الظاهر يا،بتي اني مبجاليش عازة ف الدار دي ومحدش بجا يستعني بيا واصل
اشواق :: ابدا ياما وانا اجدر بردو دة اصلة كان هدية من هچر بت كرم ومچتش فرصة،اجولك
امينة :: وهچر دي ما هي غايبة تديلها مدة يعني كل الوجت دة معاكي تلفون واني اخر من يعلم بس مش وجتة الحديت دة شوفي اخوكي يلا.
اشواق طلعت جابت،تليفونها ونزلت قالت عمالة اتصل بعصام تليفونة مجفول
زينب :: طيب اتصلي ب حسين وعرفيه
اشواق:: اتصلت بيه فعلا واتصلت بمعتز وعرفتة اللي حصل وقالها انة جاي بكره الصبح علشان يكون مع عصام

.......
عصام بعد ما خلص شراء الفيلا واستلم مفاتيحها راح غير كل كوالين الفيلا وبعدين
وبعدين راح اشتري التليفونات اللي وعد مراتة بيها وبعدين راح الشقة
طلع التليفون ولقاه فاصل شحن
حطة علي الشاحن ونسي يفتحة وراح غيرهدومة ومدد جسمة علي السرير علي وراح في النوم
صحي علي الساعة 10 بالليل. شال تليفونة من الشاحن ولبس هدومه وحط هدومة في الشنطة والموبايلات الجديدة وراح نازل ركب عربيتة ومشي علي البلد
وهو في الطريق افتكر التليفون... راح فاتحة
لقي مكالمات كتير اوي
شوية اشواق جالها رساله ان تليفون عصام اتفتح اتصلت بيه
عصام :: ايوة يا اشوااج
رشا :: انت فين من الصبح تلفونك ليه مجفول جلجتنا عليك
عصام :: مكنتش واخد بالي خالص ان التلفون مجفول .. عموما انا في طريجي للبلد
رشا :: طيب كويس تيچي بالف سلامة
عصام :: فيه حاجة ولا ايه
رشا :: لما تبجي تيچي حديت التلفون مش هينفع
.....
الدنيا اتقلبت في بيت الحاج نعمان لما كلة عرف وكل اخواتة البنات كانوا في البيت الهام وجوزها واحمد و وجدي قاعدين مستنين عصام يجي من مصر
وحسين. كلم محامي علشان يحضر مع عصام التحقيق بكره بس

وكلهم متجمعين وقاعدين كلهم مستنين عصام يجي من مصر
عصام وصل البيت علي الساعة واحدة بالليل ركن عربيتة في الچراج واخد منها الشنطة بتاعتة وشنطة الموبايلا ودخل البيت
اتفاجئ بوجود الكل قاعد ومستنيه وفهم ان فيه حاجة
زينب قامت اخدت الشنط من عصام
حمدلة بالسلام ياعصام
عصام قعد وبص عليهم وهو مستغرب مش عارف في ايه
عصام :: جلبي بيجولي في حاچة
حسين :: لا مفيش ياعصام روحي يا زينب اعملي لجمة لچوزك يتعشي
عصام :: لا انا اكلت في الطريج ..
حسين :: بصراحة ياخويا العمده چه النهاردة وجابل مراتك وجالها انك بكره الصبح تكون في المركز عند رئيس المباحث عشان عايزين ياخدو كلمتين مينيك
عصام :: اني ؟ ليه ؟
زينب :: عشان جضية جتل المدعوج كرم
وجدي :: متخفش ياعصام هما اكيد هياخدو منك كلمتين وهيمشوك
اسماء :: ربنا يسترها وتعدي علي خير
جلال :: كلنا هنروح معاك الصبح
حسين :: وانا كلمت محامي علشان يروح معاك
عصام :: محامي كمان ؟ انا مش فاهم ايتها حاچة ليه انا اللي عايزين يحججوا معايا
حسين :: عشان انت هددتة جدام الناس بالجتل
عصام :: هددتة بالجتل ؟ ده الموضوع ده من زمان اوي ده ده يچيلة اكتر من سنة
امينة :: متخفش ياعصام انت معملتش حاچة
عصام :: مخفش ازاي بس وانا شايف من جديتكم اني متهم بجتل كرم
حسين :: للاسف ياعصام المحامي قالي ان ممكن بكره تتوچهلك تهمة الجتل
عصام :: ياليلة كوبية ... يعني كرم ده يعكنن عليا حياتي وهو حي وهو ميت
وجدي :: طيب يا جماعة انا همشي والصبح بدري هكون قدام المركز
جلال :: خدني معاك يا وجدي
الحاجة امينة :: خدي چوزك يازينب وادخلوا ناموا شوية علي الصبح خلاص وانتوا يلا اطلعوا
عصام :: نوم ايه بس هو انا هيچيلي نوم
اشواق :: وحياتك ياعصام لهيطلع الموضوع بسيط بس انت جول يارب دة معتز هيچيلك الصبح المركز ويدخل معاك التحجيج اي والله
عصام :: ومعتز عرف منين ودخلة اي عشان بحضر التحجيج من اساسة
اشوااق بتوتر :: لاه دة اني كلمت هچر وهي اتحددت معاة اصلة محامي كبير ف مصر
الحاجة امينة بصت ل اشواق اوي ولاحظت توترها ف اتكلمت :: المهم انة،يكون معاك ف التحجيج يا ولدي عشان نطمنة عليك ويشكر الراچل انة هيچي من مصر عشانك
* احمد اول ما سمع ايم هجر قام من مكانة وراح ناحية اشواق وسالها علي هجر ومعتز ق قالتلة انها متعرفش حاجة عنها وانها كلمت معتز بس بسزكان لازم تقول كدة علشان العيلة و وعدتة هتسأل معتز عن هجر *
عصام :: ان شاء الله خير يا حاچة .. اه صحيح ياحسين
انا چبتلك وچبت ل اسماء مراتك تلفونات چديدة وانتي يا زينب هاتي الشنطة دي عشان چبتلك تلفون جديد
نعمة :: تلفونات ايه بس ياعصام ده وجتة
عصام :: ربك يسترها
حسين :: ربنا يخليك ياعصام بس تلفونات ايه
زينب جابت الشنطة لعصام وعصام ادا لكل واحد التليفون بتاعة
ومحدش رضي يفتح علبة التليفون ويشوفوا
بسبب زعلهم علي عصام
عصام قام علشان ينام شوية وزينب مجلهاش نوم خالص وفضلت قاعدة للصبح وهي حاطة ايدها علي راسها

الصبح بدري عصام قام استحمي ولبس هدومة وحسين كان مستنيه ومشيوا مع بعض وهناك اتقابلوا مع معتز اللي قعد مع عصام شوية وفضل يتكلم معاه علشان يعرف هو قال ايه بالظبط قدام اهل البلد لكرم ..
وجدي وجلال واحمد راحوا المركز وفضلوا واقفين مع عصام وحسين لغاية ما رئيس المباحث نده علي عصام
دخل عصام ومعتز
ورئيس المباحث فضل يوجه الأسئلة لعصام
وكان رد معتز ان عصام قال كدة لما كرم اهان ابوه قدام الكل وكان كلام لحظة ضيق مش اكتر والدليل ان عصام منفذش تهديد
وان الموضوع عدي عليه اكتر من سنة ومش من المعقول. ان عصام يستني سنة كاملة علشان ينفذ تهديده
لكن رئيس المباحث قرر تحويل عصام لوكيل النيابة ونده علي العسكري يحط الكلبشات في ايد عصام. وينزلة الحجز
عصام خرج هو والمحامي والكلبشات في ايده
حسين اول ماشاف عصام متكلبش قام مفزوع... في ايه يا چماعة طمنوني
معتز :: رئيس المباحث حول اخوك للنيابة وهيروح للنيابة المسائيه
عصام :: المحلات والارض البيت دلوك مسؤليتك ياحسين وخد بالك من مرتي وعيالي
حسين :: في عيني. وبأذن ربنا انت مش هطول هني وهترجع تاني كبير العيلة وتاخد بالك من كلة بنفسك
احمد :: احنا مش هنسيبك ياعصام
جلال :: كلنا معاك وفي ضهرك

عصام مشي مع العسكري **
اشواق عمالة تتصل كل شوية ب معتز عشان تطمن علي عصام وتطمن زينب
معتز رد عليها وعرفها اللي حصل
وزينب لما عرفت اللي تم اغمي عليها وبقت الستات بتحاول تفوقها

البيت الكبير اتملي واتقلب علي حبس عصام
والحاجة صباح مرات العمدة من الصبح راحت لزينب *
* وسامية لما عرفت راحت للحاجة فاطمة وقالتلها. والحاجة فاطمة هي كمان راحت لزينب
زينب بعد ما فاقت قعدت تعيط علي جوزها اللي اتهموه ظلم بقتل كرم والكل حوالينها
بيحاول يهديها ويقولها اكيد الحقيقة هتبان
وفاطمة قاعدة وعارفة مين اللي قتل جوزها ومش قادرة تتكلم علشان ساعتها سمعتها هتبقي في الوحل بسبب علاقة الحاج نعمان بيها **
وزينب لما فاقت وشافت الحاجة فاطمة قامت وكانت هتمسك فيها وفضلت تقولها ::_
انتي چاية ليه. كل اللي احنا فيه بسببكم
*والستات بيحوشوها بالعافية *
اشواق :: معلش يا حاچة فاطمة والنبي متزعلي منها ده غصب عنيها
فاطمة :: انا عارفة وانا فعلا غلطانة اني چيت مكنش المفروض اچي
اشواق :: لا متجوليش كدي يا حاچة فاطمة ده چيتك دي فوج راسنا وبعدين انتي ذنبك ايه
الحاجة فاطمة :: طيب انا عايزة اطلب مينيكي طلب عشان زي مانتي شايفة يمكن مجدرش اچي تاني هني وچمايل الحاچ نعمان ربنا يرحمة ومن بعده ابنة عصام مغرجاني وانا عايزة اطمن عليه يعني لو ينفع تديني ركمك اتصل بيكي
اشواق :: بس كدي حاضر هجوم اكتبلك ركمي في ورجة
اشواق قامت وكتبت رقمها وادتة للحاجة فاطمة وبعدها الحاجة فاطمة مشيت

..........................

العمدة راح لحسين البيت وسألة لو كانت محتاج مساعدة او فلوس علشان المحامي
لكن حسين قاله لا مستورة
العمدة :: طيب لو احتچت اي حاچة في اي وجت متتكسفش احنا اهل ورجبتي سدادة
حسين :: تسلم ياحاچ وانا عارف انك مش هتجصر في حاچة
الحاجة صباح :: والنبي متعملي في نفسك كدي اكيد عصام معملش حاچة وكلنا متوكدين من كدي وهيطلع بعون ربنا هيطلع.
زينب :: يارب يا حاچة صباح داحنا ملناش غيره
الهام :: النهاردة بأذن ربنا هيطلع يازينب هو عصام اخويا يجدر يجتل فرخة ده جلبة مفيش احن منة
العمدة :: طب بالأذن اني يا چماعة وهبجي اطمن مينيك يا حسين بالليل بالتلفون واشوف عصام عمل ايه عند حضرة وكيل النيابة
حسين :: ماشي ياعمي ومنچلكش في حاچة وحشة
العمدة :: خليكي انتي يا حاچة مع الهام وبالليل ابجي تعالي

العمدة مشي من عند حسين وراح دوار العمدة ومن هناك اتصل بدهشان وعرفة ان عصام ابن الحاج نعمان اتقبض عليه بتهمة قتل كرم وان عصام هو الفاعل مش زي ما هو اتهمة
دهشان :: بجا عصام هو الجاتل !؟ علي كدي احنا لازم نوصل لعصام ونشوف الفلوس اللي اخدها دي وداها فين .. بس الحكومة عرفت ازاي انة هو الجاتل
العمدة :: لا مش عارف الحجيجة بس اكيد الايام الچاية كلة هيبان
دهشان :: طيب ياعمدة عايزك تتابع الموضوع من جريب وانتوا فيه بينكم ود وصلة نسب مش كدي ؟ انا اعرف ان ابنك واخد اخت عصام
العمدة :: متجلجش يا دهشان انا متابع الموضوع ده كويس جوي انا بس جولت اعرفك الچديد علشان تشيل فكرة اني اني اللي جتلت كرم
دهشان :: الايام هي اللي هتجولي يا عمدة وياخبر النهاردة بفلوس بكره يبجي ببلاش
العمدة قفل مع دهشان وهو فرحان ان فيه حد متهم بقتل كرم علي الاقل الفترة دي
علي ما الحكومة تتوصل للقاتل الحقيقي ده لو مكنش عصام فعلا هو اللي عملها

........ڤيلا الحاج نعمان......... اوضة اشواق...
اشواق بتكلم معتز ف التليفون **

اشواق :: انت لازم تجف مع حسين في موضوع عصام اخويا
معتز :: انا قاعد هنا اربع ايام وان شاء الله النيابة تفرج عن عصام النهاردة لحسن لو مفرجتش عنه هياخد حبس علي زمة القضية هيبقي متهم رسمي بقتل كرم
اشواق : يالهوي يعني ممكن النيابة تشوف عصام هو اللي جاتل
معتز :: ممكن طبعا ومكدبش عليكي تهديد اخوكي ل كرم بالقتل ده هيضعف موقفة بس انا نفسي افهم عصام ليه هدد كرم بالقتل ؟
اشواق :: حسين جالي ان كان فيه خلافات بين ابويا وبين كرم وكرم يومها اهان ابويا جدام الناس. وعصام مستحملش وهددة بالجتل
معتز :: ايوة خلافات ايه .. علي ما اعرف ان عمر ما كان فيه تعامل بين الحاج ربنا يرحمه وبين كرم .. تبقي الخلافات دي جت منين
اشواق :: معرفش بجا
......
بالليل. احمد وحسين لبسوا هدومهم وراحوا علي النيابة وجلال ووجدي حصلوهم علي هناك
عصام دخل للنيابة علشان تحقق معاه ومعتز حضر التحقيق وبعد ساعة تحقيق خرج عصام متكلبش ومعاه معتز
حسين :: خير ياعصام ؟
عصام :: النيابة ادتني اربع تيام علي ذمة التحجيج
حسين :: وده معناه ايه يا استاذ معتظ
معتز :: معناه ان النيابة موجه لعصام تهمة القتل
حسين :: ياسنة سوخة
عصام :: خد بالك من عيالي ومراتي ياحسين دول امانة في رجبتك
حسين :: متشلش هم ياعصام .. ومتخفش احنا معاك
احمد :: كلنا معاك ياعصام متشغلش بالك ومرات وعيالك في عنينا
عصام :: شكرا يا احمد عيالي ومراتي اخويا هياخد باله منهم
وجدي :: خير ياعصام ومتخفش كلنا عارفين انك لا يمكن تقتل ابدا
جلال :: فعلا ياعصام كلنا متوكدين من برأتك

العسكري اخد عصام مشي بيه وحسين والرجالة كلهم مشيوا علي البيت واول ما زينب شافتهم داخلين من غير عصام. اشتغلت في البكاء والنحيب
حسين حكي ليهم اللي حصل في النيابة وان براءة اخوه عصام متوقفة علي وجود القاتل الحقيقي
زينب والهام واشواق ونعمة كلهم كانوا في حالة حزن وبكاء علي اخوهم عصام
حسين :: يا چماعة اللي حصل حصل هو البكا هيفيد بأيه
امينة :: انا متوكدة ان عصام برئ وعمره ما يجتل ابدا
حسين :: كلنا عارفين كدي ياما بس النيابة ليها اوراج وشهادة الشهود مش في حج عصام.. عصام هدد كرم جدام البلد كلها بالجتل
امينة :: ف لحظة غضب يا ولدي اي راچل بيجول اي حديت .. دي الام بتجول لعيالها همواتكم .. تبجا هتمواتهم بصحيح
احمد :: عندك حق يا مرات عمي بس زي ما قال حسين النيابة ملهاش دعوة غير بالدلائل
وعصام في نظر وكيل النيابة متهم

الحاجة فاطمة اتصلت ب اشواق علشان تطمن علي عصام و اشواق قالتلها انه خد اربع ايام علي ذمة التحقيقات
الحاجة فاطمة بعد ما قفلت مع اشواق. قعدت تأنب نفسها وان عصام مقتلش كرم وهي المفروض تروح وتعترف
بس هتعترف ازاي وسمعتها في البلد هتكون ازاي بعد ما البلد كلها هتعرف الحقيقة
ومش بس هي اللي هتتأذي دول كمان عيال الحاج نعمان. وبدل ما تخرج عصام من السجن ممكن تخلي سمعتهم في البلد زي الزفت وسمعة ابوهم اللي طول عمره محافظ عليها هي هتهد كل ده بكلمتين للنيابة
فضلت محتارة مش عارفة تعمل ايه
...............................
يتبع...
لقراءة الفصل السابع والعشرون : اضغط هنا
لقراءة باقي فصول الرواية : اضغط هنا
هل اعجبك الموضوع :

تعليقات